OQO: Batys Eýropa - Batys Qytaı jolynyń boıyndaǵy 348 nysan halyqaralyq standartqa saı salynbaǵan
ShYMKENT. QazAqparat - Ońtústik Qazaqstan oblysy aýmaǵynan ótetin «Batys Eýropa-Batys Qytaı» tranzıttik avtodáliziniń boıynda 440 qyzmet kórsetý nysandary ornalasqan bolsa, onyń ishinde, 348 nysan halyqaralyq standartqa saı salynbaǵany anyqtalǵan. Bul týraly búgin Óńirlik kommýnıkatsııa qyzmetinde ótken brıfıngte oblystyq Sáýlet jáne qala qurylys basqarmasynyń basshysy Erkin Júsipov málim etti, dep habarlaıdy QazAqparat HAA tilshisi.
Basqarma basshysynyń sózinshe halyqaralyq kólik dáliziniń boıynda (úsh baǵytta) 18 eldimeken, ıaǵnı, 500-den asa jeke turǵyn úıler men 41 janar-jaǵarmaı quıý beketteri ornalasqan. Ondaǵy jeke turǵyn úılerdiń qas-kelbetterin jańalaý máseleleri boıynsha birqatar usynystar engizilip otyr. 2018 jyldyń 1 shildesine deıin Ulttyq standartqa sáıkes barlyq nysandardyń qurylys zańdylyqtaryn saqtaı otyryp, talapqa saı bolýyn qamtamasyz etý kózdelýde.
Erkin Júsipov sondaı-aq «Batys Eýropa-Batys Qytaı» tranzıttik avtodáliziniń boıynda jolaýshylarǵa qyzmet kórsetetin 21 týrıstik nysan salynatynyn atap ótti. Servıstik qyzmet kórsetetin árbir týrıstik nysanǵa shamamen 10 nemese 20 gektar jerden bólinetin bolady. Búginde halyqaralyq standartqa saı keletin týrıstik qyzmetterdiń qurý jónindegi joba egjeı-tegjeıli josparlanyp jasalynýda eken.
Sonymen qatar, brıfıngte «QazAvtoJol» ulttyq kompanııasy» aktsıonerlik qoǵamynyń bas ınjeneri Nurbol Myńjasarov «Batys Eýropa - Batys Qytaı» halyqaralyq dáliziniń oblys arqyly ótetin bóliginiń uzyndyǵy 372,5 shaqyrymdy quraıtynyn atap ótti.
«Oblys aýmaǵy arqyly ótetin halyqaralyq kólik dáliziniń bólikteri 2016 jyly Shymkent-Taraz, 2017 jyly Shymkent-Tashkent baǵyttarynyń qurylysy tolyǵymen aıaqtalýy josparlanǵan. Osyǵan oraı, qazirgi tańda, jol boıyndaǵy qurylystardyń zańdylyǵyn saqtaýdy baqylaý jáne retteý jumystary júrgizilýde. Máselen, jalpyǵa ortaq paıdalanylatyn avtomobıl joldary boıynan bólingen beldeý sheginde (70m.) ǵımarattar men qurylystar salýǵa, sondaı-aq ınjenerlik kommýnıkatsııalar tóseýge tyıym salynady», - dedi Nurbol Myńjasarov.
