OQO aımaq basshysy Janseıit Túımebaev aýdan ákiminiń esebine kútpegen jerden kirip keldi
ShYMKENT. QazAqparat - Búgin Shymkent qalasyna qarasty Eńbekshi aýdanynyń ákimi Ǵalymjan Іlııasovtyń halyq aldyndaǵy esebi ótti. Jıynǵa oblys ákimi Janseıit Túımebaev kútpegen jerden kirip kelip, jurtty tańǵaldyrdy. Aımaq basshysynyń kelgenine rıza bolǵan turǵyndar ózderin tolǵandyrǵan máselelerin jetkizdi, dep habarlaıdy QazAqparat tilshisi.
Qala ákimi Nurlan Saýranbaev pen jergilikti turǵyndar, ardagerler men máslıhat depýtattary qatysqan jıynda Ǵalymjan Іlııasov 2017 atqarylǵan negizgi basymdyqtarǵa toqtalyp, aldaǵy ýaqytta júzege asyrylatyn jumystar barysyn baıan etti. Eseptik jıynda turǵyndardyń basym bóligi kópqabatty úılerdiń aýlasyn jaryqtandyrý men oıyn alańshalaryn salý jáne káriz júıesi men jol, jer telimi máselesin kóterdi. Halyqtyń saýaldary men usynystaryn muqııat tyńdaǵan oblys ákimi kóterilip jatqan máseler kezeń-kezeńimen sheshimin tabatynyn aıtyp, qaladaǵy kommýnaldyq máselelerdi retke keltirý úshin oblystyq bıýdjetten bólinetin qarjy jyl saıyn artyp keletinin jetkizdi.
«Osynda kóterilgen problemanyń barlyǵy nazarǵa alynyp, tıisti jumystar atqarylatyn bolady. Ózderińizge málim, búginde qala aýmaǵyna 70 myń gektar jer qosylyp, Astana men Almaty qalalary sekildi kólemi ulǵaıyp otyr. Qala aýmaǵy ulǵaıǵan saıyn kommýnaldyq máselelerdiń artatyny da belgili. Al barlyq másele birden sheshile qoımaıdy, ony bilesizder. Shahar aýmaǵyn kóriktendirip, turǵyn úı-kommýnaldy sharýashylyq salasynyń jumystary jospar boıynsha istelinip jatyr. Aldaǵy ýaqytta qala aýmaǵynda 64 kóshe ortasha jóndeýden ótetin bolsa, 36 kóshe kúrdeli jóndeledi. Al onǵa jýyq kóshege jaıaý júrginshiler joly salynady»,- dedi aımaq basshysy.
Budan bólek, Janseıit Túımebaev aýdan ákimine turǵyndardan kelip túsken saýaldardyń kúrdeliligine baılanysty jiktep, úsh kúndik, 1- 2 aptalyq jáne bir aılyq merzimdermen oryndalýy týraly keste ázirleýdi tapsyrdy. Muny bir Eńbekshi aýdanyna ǵana emes, qaladaǵy ózge de aýdan ákimderine júktep, olardyń oryndalýyn oblys ákimi apparatynyń ınspektorlary baqylaıtynyn atap ótti.
