OQO aýyl sharýashylyǵynda ozyq tehnologııalardy qoldanýda kósh basynda tur
ASTANA. QazAqparat - Agrarly aımaq - Ońtústik Qazaqstan oblysy ozyq tehnologııalardy qoldanýda kósh bastap tur. Máselen, jańa bastamamen oblysta alǵash ret 59 gektar jerge jańǵaq, 7 gektarǵa badamsha egildi. Al, tamshylatyp sýarý ádisi 7,5 myń gektar jerge endirilip, jalpy kólemi 58,5 myń gektarǵa jetti. Bul respýblıkalyq úlestiń 72 paıyzyn qurap otyr.
Sondaı-aq, óńirde jalpy jylyjaılar kólemi 1 294 gektardan assa, bıyldyń ózinde 171 ga jerge jylyjaı salyndy. Bul elde bar jylyjaılardyń 80 paıyzyn quraıdy. 
Osyndaı ozyq tehnologııany qoldanýdyń arqasynda oblysta aýyl sharýashylyǵynyń jalpy ónim kólemi 57 mlrd. teńgege kóbeıip, 376,5 mlrd teńgeni qurady. Bıylǵy jyly sharýalar bıdaı men arpanyń ár gektarynan 18,3 tsentnerden ónim alyp, 400 myń tonnaǵa jýyq astyqty qambaǵa quıdy. Odan bólek, 116 myń tonna jemis-jıdek, 919 myń tonna kókónis, 77 myń tonna júzim, 295 myń tonna kartop pen 1,3 mln tonna baqsha daqyldaryn jınady.
Sonymen birge, aýdandardyń geografııalyq jáne klımattyq erekshelikterine baılanysty ár aýdannyń áleýetin tıimdi paıdalaný jáne aýyl sharýashylyǵy ónimderin ulǵaıtý maqsatynda ósimdik sharýashylyǵyn damytýdyń negizgi baǵyttary aıqyndaldy. Atap aıtqanda, egin alqaptarynda tereń qopsytý jáne tikeleı sebý ádisin paıdalaný, taýly aımaq - Tólebı, Túlkibas, Qazyǵurt, Báıdibek, Saıram aýdandarynda bıdaı daqylynyń ornyna erte merzimdik kartop egý, jańǵaqty jáne jıdek daqyldarynyń kóshetterin otyrǵyzý jáne ósirý shyǵyndarynyń qunyn jergilikti bıýdjetten sýbsıdııalaý máselesi qarastyrylmaq.
Oblystyq aýyl sharýashylyǵy basqarmasynyń mamandary osy baǵyttaǵy jumystar aldaǵy jyldary da óz jalǵasyn tabatynyn aıtyp otyr.
