OQO: Aýyl sharýashylyǵyna ınvestıtsııa úsh esege artty
ShYMKENT. QazAqparat - Ońtústik Qazaqstan oblysynyń aýyl sharýashylyǵy salasynyń negizgi kapıtalyna baǵyttalǵan ınvestıtsııalar kólemi 2017 jyldyń 11 aıynda 34 mlrd teńgeni qurady. Bul ótken jyldyń sáıkes merzimimen salystyrǵanda 3 esege artyq, dep habarlaıdy QazAqparat oblystyń aýyl sharýashylyǵy basqarmasyna silteme jasap.
Qarjylyq qoldaýdyń arqasynda óńir sharýalary mal basyn ulǵaıtýǵa múmkindik aldy, al jumyssyzdar óziniń sharýashylyǵyn dóńgeletip jatyr. «Sybaǵa» baǵdarlamasy boıynsha, fermerler 18 myń múıizdi iri qara, «Altyn asyq» baǵdarlamasy boıynsha, 65 myń bas qoı, «Qulan» baǵdarlamasy boıynsha 3 myń jylqy aldy.
«Nátıjeli jumyspen qamtý» baǵdarlamasy boıynsha, 3,2 mlrd teńge bólinip, ıgerilgen. Al «Aýyl sharýashylyǵyn qoldaý qory» óńirlik bólimshesi arqyly 4,8 mlrd teńge bólindi jáne bul somanyń basym bóligi osy ýaqytta ıgerildi. Sonymen qatar, ońtústiktiń sý sharýashylyǵy nysandaryn aǵymdaǵy jáne kúrdeli jóndeýden ótkizý úshin 2 mlrd teńge bólindi.
Aıta ketetin másele, bıylǵy jyldyń kókteminde óńirde Halyqaralyq janýarlardy qorǵaý uıymynyń mamandary bolyp, mal sharýashylyǵy nysandarynyń barlyǵyna ınspektsııa júrgizdi. Osylaısha, ońtústiktiń sharýalary óńirde óndirilgen etti eksporttaýǵa múmkindik aldy.
