OQO aýyl sharýashylyǵy ónimi boıynsha jaqsy nátıje kórsetti
ShYMKENT. QazAqparat - Ońtústik Qazaqstan oblysyndaǵy aýyl sharýashylyǵy óniminiń kólemi ótken jyly 522 397 mln teńgeni qurap, eki paıyzǵa artty. Nátıjesinde ońtústik óńir respýblıkadaǵy aýyl sharýashylyǵy jalpy óniminiń úlesi boıynsha 2 orynǵa turaqtady, dep habarlaıdy QazAqparat tilshisi.
Oblystyq statıstıka departamentiniń basshysy Aıdar Ábildabekovtyń sózinshe, mal sharýashylyǵy 4,2 paıyzǵa kóbeıip, ónerkásip kásiporyndary qoldanystaǵy baǵamen 858 458 mln teńgeniń ónimi óndirilgen.
«Ken óndirý ónerkásibi jáne karerlerdi qazý salasynda - 181 098 mln teńge, óńdeý ónerkásibinde - 585 740 mln teńge, elektrmen jabdyqtaý, gaz, bý berý jáne aýany baptaýda - 76 435 mln teńge jáne sýmen jabdyqtaý, káriz júıesi, qaldyqtardyń jınalýyn jáne taratylýyn baqylaý boıynsha - 15 185 mln teńgeniń ónimi óndirildi», -dedi Aıdar Ahmetbekuly.
Aıta keterligi, respýblıkadaǵy ónerkásip óniminiń úlesi boıynsha 3,8 paıyz kórsetkishpen oblys 8-oryndy, al ósý qarqyny boıynsha 11-oryndy alyp otyr.
Departament basshysynyń aıtýynsha, óńirde jumys istep turǵan shaǵyn jáne orta kásipkerlik sýbektileriniń sany aǵymdaǵy jyly 213 028 birlikti quraǵan. Elimiz boıynsha jumys isteıtin sýbektilerdiń 13,8 paıyzy ońtústik óńirine tıesili.
