OQO aýmaǵynda tasqyn sý qaýpin aldyn alý jumystary júrgizilýde
ShYMKENT. QazAqparat - Ońtústik Qazaqstan oblysynda tasqyn sýdan keler qaýiptiń aldyn alý sharalary júrgizilip jatyr.
Jol salasyna qatysty mamandar qysta atqaratyn mindetterin aıaqtap, kóktemdegi saqtyq sharalaryna kirisip ketti, dep habarlaıdy QazAqparat HAA tilshisi.
Tótenshe jaǵdaılardyń aldyn alý jumystaryn uıymdastyryp júrgen «Ońtústik joldary» memlekettik kommýnaldyq kásipornynyń mamandary búginde Túrkistan jáne Arys qalalary men Sozaq, Túlkibas, Ordabasy aýdandarynda jaǵdaıdy qalpyna keltirýde. Kólikterdiń qaýipsiz yńǵaıly qozǵalysyn qamtamasyz etý jumystaryn júrgizip jatyr. Jumystardy atqarýǵa mekemeniń 100-den astam jumysshysy jumyldyryldy.
Atap aıtsaq, «Ońtústik joldary» jumysshylary dál qazirgi tańda Sozaqtaǵy KH-57 «Sozaq-Qaraǵur-Baqyrly» avtomobıl jolyndaǵy sý qubyry buzylǵan 37+900 shaqyrymyn qaıta qalpyna keltirip, montajdaý jumystaryn júrgizgen bolsa, Túlkibastyń KH-69 «Tastumsyq-Jylandy-Azattyq-Shuqyrbulaq» avtomobıl jolynyń 69+950-69-650 shaqyrymyndaǵy sý qubyrlarynda oryn alǵan tasqyn sýdy arnaıy tehnıkalarmen qalpyna keltirý sharýalaryn atqarýda. Túrkistanda da osyndaı jaǵdaı. Onda qazirgi tańda KH-58 «Túrkistan-Baltakól-Nurtas aýyly-Shornaq-Qarnaq-Kentaý» 69+500 shaqyrym aralyqtaryn jáne KH-84 «Túrkistan-Baltakól» avtomobıl jolynyń 19-26 shaqyrym aralyqtarynda tasqyn sý júrýde. Nysandaǵy búgingi ahýaldy mamandar damby salý arqyly turaqty jaǵdaıda ustap otyr.
Oblystyq jolaýshylar kóligi jáne avtomobıl joldary basqarmasynyń basshysy Nurlan Baıǵuttyń málimetinshe, jaýyn-shashyn basylyp, tasqyn sýdan keletin qater seıilgenshe mekeme mamandary jaǵdaıdy turaqty baqylaýda ustaıdy. Al, joǵaryda atalǵan aýdan, qalalardan óńirdiń ózge aımaqtaryndaǵy ahýal qanaǵattarlyq qalypta.
