OQO: Arys ózeninde jańadan salynǵan kópirdiń eki janyn sý shaıyp ketti
ShYMKENT. QazAqparat - Ońtústik Qazaqstan oblysynda Arys ózeninde jańadan salynǵan kópirdiń eki janyn sý shaıyp, qaýipti jaǵdaı týǵyzǵan. «Batys Qytaı - Batys Eýropa» dálizi boıynda ornalasqan ótkeldiń jaǵdaıy qaýipti bolýyna baılanysty óńirdiń tótenshe jaǵdaılar qyzmeti kólikterdiń jolyn jaýyp, aýyldyń ishimen júrgizýde, dep habarlaıdy QazAqparat HAA tilshisi.
Oblystyq Tótenshe jaǵdaılar qyzmeti departamentiniń bastyǵy Nurbolat Derbisovtiń sózinshe, keshe tús aýa Shymkentten 40 shaqyrym qashyqtyqta, Qajymuqan aýylynyń tusyndaǵy Arys ózeniniń sý deńgeıi shamadan tys kóterilip, janyndaǵy jaqtaýshalaryn aǵyzyp ketken.
Qaýipti jaǵdaı Jambyl oblysynan keletin Boroldaı ózeniniń deńgeıi 40 santımetrge deıin kóterilip, Arys ózenine kóp mólsherde sý jiberilýinen týyndaǵan. Kópirdiń jaqtaýlary buzylǵan soń, Arysqa jiberilgen sýdyń deńgeıi tómendetildi. Al,quzyrly organ ókilderi men tótenshe jaǵdaılar qyzmetiniń basshylyǵy kópirdi jaýyp, kólikterdi basqa jolmen júrgizý týraly sheshim qabyldady.
Qazir mańyzdy joldyń kólik júrgizýshileri Ordabasy aýdanynyń ortalyǵy Temirlan aýylymen júrýde. Nurbolat Derbisov sondaı-aq bul kópirdiń áli kúnge deıin qabyldanbaǵanyn aıtady. Soǵan qaramastan ótkelden ótetin kólikter legi osy kúnge deıin tolastamaǵan. Al, kópir mańynda qaıta qalpyna keltirý jumystaryn júrgizý úshin sýdy tolyqtaı toqtatý qajet eken. Sýdy toqtatý jumystaryna 18 adam men 7 tehnıka jumyldyryldy.
