OQO ardagerleri óńirdegi birqatar zaýyttardy aralady
ASTANA. QazAqparat - Búgin Ońtústik Qazaqstan oblysynyń 80-ge jýyq ardageri men zııaly qaýym ókilderi óńirdegi birqatar óndiris oshaqtaryn aralap kórdi, dep habarlaıdy ákimnyń baspasóz qyzmeti.
Ondaǵy maqsat - ardagerlerimizdi oblysymyzdyń ekonomıkalyq áleýetimen tanystyryp, aldaǵy atqarylar jumystarmen habardar etý bolatyn.
Ardagerler eń aldymen «Ońtústik» arnaıy ekonomıkalyq aımaǵynda ornalasqan «BalTekstıl» JShS-niń kilem fabrıkasyna atbasyn burdy. Іrgetasy 2012 jyly qalanǵan fabrıka búginde Orta Azııadaǵy kilem óndiretin eń iri óndiris oshaǵy sanalady. Búginde munda 235 adam jumyspen qamtylǵan. Qazirgi tańda fabrıka ónimderi Qyrǵyzstan, Tájikstan, Ázirbaıjan, Reseı, Ulybrıtanııa, Germanııa jáne Frantsııaǵa eksporttalýda. Kásiporyn basshylyǵynyń aıtýynsha, bıyldyń ózinde zaýytqa sheteldik tapsyrys berýshiler sany 20-dan asypty. Fabrıkanyń jip ıirý tsehy men kilem toqý bólimderin aralap kórgen ardagerler kásiporyn jumysyna oń baǵasyn berdi.
«Qoǵamnyń qazynasy, aqylshysy - ardagerler. Osyny eskerip, búgingi sharany uıymdastyryp otyrǵan óńir basshysyna alǵysymyz sheksiz. Oblysymyzdyń ekonomıkalyq ahýaly kún sanap jaqsaryp kele jatqynyn baıqap, bilip otyrmyz. Sonda da zaýyttardy óz kózimizben kórip, atqarylyp jatqan jumystardyń kýási bolýymyz biz úshin úlken qýanysh. Endigi jerde biz ardagerler jer-jerlerde óńirde atqarylyp jatqan jumystardy nasıhattap, halyqty yntymaq, birlikke úndeýimiz kerek», - deıdi Qazaqstannyń qurmetti jýrnalısi, zeınetker Baıdýlla Qonysbek.
Ardagerler atbasyn burǵan ekinshi nysan - «Ońtústik» ındýstrııaldy aımaǵyndaǵy «Evrokrıstall» shyny zaýyty boldy. Munda jylyna 300 mln dana shyny quty shyǵarylady. Óndiris oshaǵy álemniń ozyq qural-jabdyqtarymen jabdyqtalǵan. Qazir 150-ge jýyq azamat jumys isteıdi. 
Munan soń ardagerler «Tectum Engineering» shıfer óndirý zaýytynyń jumysymen tanysty. Kásiporyn jylyna 2,3 mıllıon dana shıfer óndiredi. Joba quny 1.9 mlrd teńgeni quraıdy. «Hatchek» ádisimen shıfer shyǵaratyn zaýytta 200 adam jumyspen qamtylǵan. Al shyǵarǵan ónimderiniń 60 paıyzy ishki naryqty qamtysa, qalǵany Tájikstan, Aýǵanstan, Ózbekstan, Qyrǵyzstanǵa eksporttalady.
«Ońtústik» ındýstrııaldy aımaǵyndaǵy kórme ortalyǵy da aqsaqaldardyń nazarynan tys qalǵan joq. Zaýyt jumystaryn óz kózimen kórgen qarııalar kásiporyn basshylaryna alǵysyn bildirip, aldaǵy jumystaryna tabys tiledi.
Sýret avtory: Isametov Sabyrjan
