OQO: Anasy ólimshi etip sabaǵan balanyń jaǵdaıy áli de aýyr
ShYMKENT. QazAqparat - Ońtústik Qazaqstan oblysynda anasy ólimshi etip urǵan balanyń jaǵdaıy aýyr kúıinde qalyp otyr, dep habarlaıdy QazAqparat tilshisi.
Saıram aýdandyq aýrýhanasy dárigerleriniń aıtýynsha, 6 jasar Muratjan Bekbaevtyń jaǵdaıy óte aýyr. Denesiniń saý tamtyǵy qalmaǵan. Mıyna zaqym kelip, súıekteri synǵan. Terisi tyrnalyp, qantalap ketken.
«Alty jasar bala aýrýhanaǵa túngi ekide, óte aýyr jaǵdaıda tústi. Dıagnozyn anyqtaý barysynda mıy shaıqalǵany belgili boldy. Onyń ústine, búıregine de zaqym kelgen, úshinshi dárejeli travmatıkalyq shok alǵan. Barlyq jerinen qan ketip, denesi muzdap qalǵan. Kóp qan joǵaltqandyqtan, eki ret qan quıyldy. Jasandy tynys alý apparatyna qosqan bolatynbyz. Degenmen, tıisti emdik sharalardyń arqasynda balanyń beti beri qarap, esin jıdy. Ózdiginen tynys ala bastady. Biraq jaǵdaıy áli de turaqty aýyr kúıinde qalyp otyr. Oblystan mamandar shaqyrtyp, neırohırýrgter tekserdi. Olardyń sózinshe, ota týraly aıtý áli erte. Sebebi mıyn tolyqqandy teksermeı, eshqandaı áreket jasaýǵa bolmaıdy. Al ony túsiretin bul aýylda arnaıy apparat joq. Tasymaldaýǵa balanyń jaǵdaıy kótermeıdi»,- deıdi jansaqtaý bóliminiń meńgerýshisi Erkın Sarmanov.
Dárigerler balaǵa áli uzaq ýaqyt em qabyldaý qajettigin aıtady. Al balasyn ólimshi etip sabaǵan kelinshek jalǵyzbasty ekeni anyqtaldy. Osy kúnge deıin turmysqa shyqpaǵan. Týystarynyń sózinshe, Muratjan bıyl ǵana mektep tabaldyryǵyn attaǵan. Ol ápkesi ekeýi naǵashylarynyń qolynda tárbıelenedi. Qalada jumyssyz júrgen kelinshek perzentterin asyraı almaǵandyqtan, aýyldaǵy aǵasy men jeńgesiniń qolyna tapsyrǵan.
Esterińizge sala keteıik, osydan tórt kún buryn aýyr soqqydan komaǵa túsken bala Saıram aýdandyq aýrýhanasyna jetkizilgen bolatyn. Keıinnen polıtseıler alty jasar balany ólimshi etip sabaǵan anasyn qamaýǵa aldy. Tergeý barysynda 36 jastaǵy kelinshek ulyn dápterge durys jazbaǵany úshin urǵanyn aıtqan. Qazirgi tańda onyń ústinen Qylmystyq kodekstiń 103-baby («Densaýlyqqa qasaqana aýyr zııan keltirý») boıynsha is qozǵaldy. Tergeý amaldary júrgizilýde.
