OQO: Álem chempıony úılendi
ShYMKENT. QazAqparat - Ońtústik Qazaqstan oblysy, Shardara aýdanynyń týmasy, álemniń eki dúrkin chempıony Shynbolat Raıhanov úılendi. Álemniń eń myqty sportshylarynyń biri, Álem kýbogynyń ıegeri týǵan jerinde dúıim jurtqa toı jasady, dep habarlaıdy QazAqparat HAA tilshisi.
Chempıonnyń qýanyshyna oraı shaǵalaly aýdanǵa oblystyq dene shynyqtyrý jáne sport basqarmasy basshylyǵy, jergilikti bılik ókilderi kelip, arnaıy quttyqtaýlaryn jetkizdi. Sportshynyń ustazy, Shardara aýdandyq dene shynyqtyrý jáne sport bólimi basshysy Arman Qarsybaev ta jas jubaılarǵa baqytty ǵumyr tiledi. Toıda sondaı-aq álemdegi eń myqty komandalardyń biri, "Shardara Armsport" sport klýbynyń sportshylary, Azııanyń absolıýtti chempıony Berik Taǵabaev, Qazaqstan Respýblıkasyna eńbek sińirgen jattyqtyrýshy Nurjan Tórequlov, Álem chempıonatynyń eki dúrkin jeńimpazy Seıfýlla Nurhalyqov bastaǵan álem chempıondary, Azııa chempıondary da áriptesterine izgi tilekterin bildirdi. Al, estrada juldyzdary Qaırat Túntekov pen Qýatjan Bazarbaev án men ázilden shashý shashty. Osylaısha Shynbolat pen kelinshegi Gúlaıymnyń dúbirli toıy keń kólemde atalyp ótildi.
Aıta keteıik, armlestıng básekesi boıynsha Qazaqstan namysyn qorǵap júrgen Shardaranyń shymyr jigitteriniń arasynda Shynbolat Raıhanov álemdik dodalarda jeńimpaz atanyp júrgen sportshy. Ol búginde Álemniń eki dúrkin chempıony, Álem kýbogynyń ıegeri.
