OQO ákiminiń jańa orynbasary taǵaıyndaldy

ASTANA. QazAqparat - Prezıdent Ákimshiligi kelisimimen jáne Ońtústik Qazaqstan oblysy ákimi Janseıit Túımebaevtyń ókimimen OQO ákiminiń orynbasary bolyp Baýyrjan Saldaruly Jamalov taǵaıyndaldy. Bul týraly búgin óńir basshysy kadrlyq másele boıynsha ótken májiliste málimdedi.

- Oblys ákiminiń orynbasary laýazymy bos ekendigi ózderińizge belgili. Osyǵan oraı, Prezıdent Ákimshiligi kelisimimen oblys ákiminiń orynbasary laýazymyna Baýyrjan Saldaruly Jamalovty  taǵaıyndaý týraly sheshim qabyldadym. Baýyrjan Saldaruly ekonomıka jáne qarjy salalarynda zor tájirıbesi bar bilikti maman. Túrli qarjylyq qurylymdarda baıqaýshy keńesterdiń múshesi qyzmetin atqarǵan. Osy tájirıbesi oblys ákiminiń orynbasary retindegi aldaǵy jumysynda  úlken kómegi tıetin  bolady, - dedi Janseıit Qanseıituly.

Baýyrjan Saldaruly oblys ákiminiń orynbasary retinde kásipkerlik, ındýstrııalyq-ınnovatsııalyq damý, aýyl sharýashylyǵy jáne týrızm salalaryna jetekshilik jasaıdy.

Oblys ákimi oǵan aýyl sharýashylyǵy salasyndaǵy ózekti máselelerine tereń taldaý jasap, olardyń sheshilýin qamtamasyz etý, oblystyń áleýetin eskere otyryp kásipkerlik pen týrızmge jan-jaqty qoldaý kórsetip, damýǵa yqpal jasaý, ınvestıtsııalar tartýdy, ındýstrııalandyrý   kartasynyń  ýaqtyly jáne sapaly atqarylýyn uıymdastyrýdy tapsyrdy.

Baýyrjan Saldaruly Jamalov 1971 jyly 27 shildede týylǵan. Bilimi joǵary, ınjener-mehanık - tehnolog, zańger mamandyqtaryn ıgergen.

Eńbek jolyn 1993  jyly Shymkent qalasynda  bıznes salasynda bastaǵan. Uzaq jyldar kásipkerlik salasynda eńbek etip, basshylyq laýazymdarda mol tájirıbe jınaǵan.

Búginge deıin «Myrzakent-Holdıng» jaýapkershiligi shekteýli seriktestiginiń dırektory bolyp eńbek etip keldi. Altynshy shaqyrylymdaǵy oblystyq máslıhattyń depýtaty bolyp saılanǵan.