OQO ákiminiń azamattardy qabyldaýyna quzyrly organ basshylary da qatysty
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev turǵyndardy jeke máselelerimen qabyldady. Buǵan oblystyq sot, prokýratýra, oblystyq jáne qalalyq jergilikti polıtsııa qyzmetiniń, ishki ister jáne ádilet departamentiniń basshylary da qatysty, dep habarlaıdy QazAqparat tilshisi.
Aıta keteıik, óńir basshysy esep berý jıynynda birqatar azamattardyń aryz-shaǵymdaryn tyńdaý maqsatynda jeke qabyldaý ótkizetinin aıtqan bolatyn. Osyǵan baılanysty uıymdastyrylǵan qabyldaýǵa 34 azamat kelip, ózderin mazalaǵan saýaldaryn jetkizdi. Qabyldaýǵa birinshi kirgen shymkenttik Natalıa Smırnova kórshisiniń jalpyǵa ortaq jer telimin zańsyz ıemdenip alǵanyn, kórshilerimen bir bitimge kele almaı sottasyp júrgenderine 4 jylǵa jýyqtaǵanyn aıtty. Máseleniń mán-jaıymen tanysqan óńir basshysy uzaqqa sozylǵan daýdyń zań aıasynda sheshilýine yqpal etý úshin tıisti sala basshylaryna tapsyrma berdi.
«Kórshiler arasyndaǵy daýdyń bastalǵanyna biraz ýaqyt ótipti. Birneshe ret sotqa da júginipsizder. Demek, bul máseleni sheshý úshin tereńirek zerdeleý kerek. Sondyqtan da men quqyq qorǵaý jáne ákimdik qyzmetkerlerin arnaıy shaqyrtyp otyrmyn. Endi siz aıtyp otyrǵan máseleni mamandar zań aıasynda sheshýdi muqııat qaraıdy. Bul másele jeke qadaǵalaýymda bolady», - dedi Janseıit Qanseıituly.
Máselesi dál búgin sheshilmese de oǵan quzyrly organ basshylary aralasyp, anyq-qanyǵyn tekseretinin estigen qala turǵyny oblys ákimine alǵysyn bildirdi.
«Búgin bizdi jeke qabyldap, máseleniń ońtaıly sheshýge tapsyrma bergenińiz úshin sizge alǵysym sheksiz», - dedi Natalıa Smırnova.
Al, Aqtas eldi mekeniniń turǵyny aýylynda aýyz sý, jaryq, gazdyń joqtyǵyn aıtyp, shaǵymdandy. Onyń aıtýynsha, eldi mekendegi elektr energııasynyń sapasyzdyǵynan úıdegi turmystyq tehnıkalar kúıip ketýde eken. Sondaı-aq, ol aýyl mektebi men medıtsınalyq beket ınternetpen qamtylmaǵanyn jetkizdi. «Qaınarbulaq» saıajaıynyń turǵyny bolsa, balasynyń ólimine qylmystyq árekettiń sep bolǵanyn aıtyp, jergilikti tártip saqshylarynyń óz jumysyna salǵyrttyǵyn synǵa aldy.
Óńir basshysynyń qabyldaýynda bolǵan ózge azamattar jer daýy, mal urlyǵy, qoǵamdyq kólik qatynasy joqtyǵyn aıtyp shaǵymdandy. Al bir toby aýyl sharýashylyǵy salasynda qurylǵan kooperatıv týraly aryzdandy. Olar kooperatıv tóraǵasyn zańsyz áreketterde bardy dep aıtyptap otyr.
Máseleniń mán-jaıyna qanyqqan oblys ákimi jaýapty basqarmalar men quzyrly organ basshylyǵyna qabyldaýda bolǵan azamattardyń kótergen ótinish-tilegine barynsha nazar aýdaryp, ońtaıly sheshýdi júktedi.
