OQO ákimi Jumat Shanınniń urpaqtarymen kezdesti
ASTANA. QazAqparat - Ońtústik Qazaqstan oblysynyń ákimi Janseıit Túımebaev Jumat Shanınniń 125 jyldyq mereıtoıyna arnalǵan «Teatr dánin tamyrlatqan tarlan» atty eske alý saltanatty keshine kelgen qonaqtarmen kezdesti, dep habarlaıdy óńirlik ákimdiktiń baspasóz qyzmeti.
Olardyń qatarynda teatr tarlanynyń týǵan nemereleri «Túrik áleminiń rýhanı murasy» qoǵamdyq qorynyń tóraǵasy Bolat Shanın, Raıhan men Janat Qasymhanqyzdary da bar.
Kezdesýde sóz alǵan óńir basshysy bıyl oblysymyzda qazaqtyń tuńǵysh halyq ártisi, kásibı rejısseri, dramatýrg Jumat Shanınniń 125 jyldyǵyna oraı 30-ǵa jýyq mádenı is-sharalardyń joǵary deńgeıde atalyp ótkenin jetkizdi.
«Qazaq halqynyń teatr ónerin damytýda Jumat Shanın atamyzdyń eńbegi ushan teńiz. Qazaqtyń birtýma perzenti ult teatrynyń negizin qalap, kásibı turǵyda qalyptastyryp, sahnalyq-shyǵarmashylyq jaǵynan ósý jolynda zor eńbek sińirdi. Teatr tarlanynyń 125 jyldyǵyna oraı aǵymdaǵy jyldyń basynda oblys ákimdigi tarapynan is-sharalar jospary túzilip, arnaıy jumysshy top qurylǵan bolatyn. Bıylǵy jyldyń sáýir aıynda Túrkistan men Shymkent qalasynyń teatrlarynda «Túrkistan - Túrki áleminiń mádenı astanasy» jylynyń aıasynda Túrki áleminiń teatrlar festıvali ótkizildi», - dedi Janseıit Qanseıituly.
Teatr tarlanynyń 125 jyldyǵyna oraı bıyl oblysymyzda «Qazaq teatrynyń atasy», «Teatr tarlany», «Tuńǵysh rejısser, dramatýrg, teatr qaıratkeri», «Tulpardyń tuıaǵy, asyldyń synyǵy», «Jaryq juldyz - Jumat Shanın», «Teatr jáne kórermen» taqyryptarynda kórmeler, kezdesýler ótkizilgen bolatyn. Atalǵan is-sharalarda Jumat Shanınniń ómir joly, eńbek joly, adam ómirindegi teatrdyń atqaratyn róli jaıynda keńinen nasıhattaldy. Osy is-sharalarǵa erekshe qoldaý bildirgen oblys ákimine Jumat Shanınniń nemereleri shyn rızashylyǵyn bildirdi.
«Bıyl Ońtústik Qazaqstan oblysynda atamyzdyń 125 jyldyq mereıtoıy joǵary deńgeıde atalyp ótýde. Kóktemde ózińizdiń jeke qabyldaýyńyzda bolyp, is-sharalar jospary týraly aqyldasqan bolatynbyz. Mine, birneshe aıdan soń sol aıtylǵan, josparlanǵan dúnıelerdiń iske asyp otyrǵanyn kórip otyrmyz. Osy rette atamyzdyń mereıtoıyn ótkizýge atsalysyp, erekshe qoldaý bildirgenińiz úshin rııasyz alǵysymyzdy bildiremiz», - dedi Raıhan Qasymhanqyzy.
Kezdesý sońynda óńir basshysy Jumat Shanın atamyzdyń nemerelerine arnaıy syı-sııapat jasap, «Teatr dánin tamyrlatqan tarlan» atty eske alý keshiniń sátti ótýine tilektestigin bildirdi.
Atap ótý kerek, Jumat Shanın atyndaǵy qala kóshesinde uly tulǵaǵa arnalǵan memorıaldy taqtasynyń ashylý saltanaty jáne teatr sahnasynda Jumat Shanınniń 125 jyldyq mereıtoıyna arnalǵan «Teatr dánin tamyrlatqan tarlan» atty eske alý keshi ótedi.
