OQO ákimi Shymkenttiń mıllıonynshy turǵynyna páter kiltin tabystady
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev pen qala ákimi Nurlan Saýranbaev Shymkent qalasynyń 1 mıllıonynshy turǵyny dúnıege kelgen Elamanovtar otbasyn quttyqtap, jas otbasyǵa 2 bólmeli páterdiń kiltin tabys etti, dep habarlaıdy QazAqparat tilshisi.
Búgin jas otbasy Samat Elamanov pen Aıjan Ahaıbekovanyń tuńǵyshy Aısulý shymqalanyń mıllıonynshy turǵyn atanyp otyr. Qalanyń kópten kútken nárestesi osy jyldyń 17 mamyrynda dúnıege kelgen. Áli bir aıǵa da tolmaǵan sábıdiń ata-anasyna jańadan salynyp jatqan móltekaýdandaǵy toǵyz qabatty úıdiń altynshy qabatynan páter berildi.
Olar ózderine kórsetilip jatqan úlken qurmet pen syı úshin oblys basshylyǵyna rızashylyǵyn bildirdi. Erli-zaıyptylarǵa páter kiltin tabystaǵan aımaq basshysy Shymkent elimizdegi mıllıondyq halqy bar úsh qalanyń birine aınalyp otyrǵanyn atap ótti.
«Buryn mıllıon turǵyny bar Almaty ǵana bolsa, qazir mıllıon turǵyny bar eki qala qosyldy: Astana men Shymkent. Astana ótken jyldary mıllıondyq qala atansa, Shymkent bıyl mıllıon halqy bar qalaǵa aınalyp otyr. Elbasy búkil dúnıe júziniń qaıratkerleri qatysqan ekonomıkalyq forýmda Shymkent qalasyn mıllıoner qala dep jarııalady. Al shymkenttikter respýblıkalyq statýs ıelený bastamasyn óte qyzý qarqynmen qoldady. 2017 jyldyń qorytyndysyna sáıkes oblys ortalyǵynyń turǵyndary 39 myń adamǵa ósti. Munyń 18 myńy ishki kóshi-qon esebinen júzege asqan. Al qalanyń mıllıonynshy turǵyny mamyr aıynda dúnıege kelgen bolatyn. Ol - ózderińiz kórip otyrǵan Aısulý Elamanova, jas otbasynyń birinshi perzenti. Shymkenttikterdiń atynan osy aıtýly oqıǵamen shyn júrekten quttyqtaımyn. Kishkentaı náresteniń deni saý, eline eleýli, halqyna qalaýly qyz bolyp ósip, eldiń naǵyz patrıot azamatshasy bolsyn!» - dedi oblys ákimi.
Aıta keteıik, kishkentaı Aısulýdyń ákesi Samat Elamanov 23 jasta. Ol Shymkent qalasynyń júıke aýrýlar aýrýhanasynda jumys isteıdi. Al, anasy Aıjan Ahaıbekova 22 jasta. Jas kelinshek qaladaǵy bankterdiń birinde menedjer bolyp qyzmet atqarady.
