OQO ákimi sheteldik BAQ ókilderimen kezdesti
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev sheteldik jetekshi buqaralyq aqparat quraldarynyń ókilderimen kezdesti, dep habarlaıdy QazAqparat tilshisi.
Elimizge QR Syrtqy ister mınıstrliginiń shaqyrtýymen kelgen delegatsııa quramynda mádenıet jáne óner taqyryptary boıynsha mamandanǵan Amerıka Qurama Shtattary «Forbes» jýrnalynyń ókili Aleksandr Lıpovsev pen Ulybrıtanııanyń «Opera Now» jýrnalynyń ókili N.Djoýns, Birikken Arab Ámirlikteriniń «The Diplomatic Society» jýrnalynyń ókili Bhana Kırtan, Egıpet eliniń «Nıl-Kýltýra» telearnasynyń ókili Ahmed Fatma, ıtalııalyq IA «IN TERRIS» agentiginiń ókili Fabıo Beretta, ıspanııalyq «El Cultura» jýrnalynyń ókili Fernando Dıas, japondyq «Kıodo Tsýshın» aqparat agentiginiń ókili Lınýma Kenıshı bastaǵan 20-dan astam qonaq bar. Basqosýda sóz alǵan aımaq basshysy ońtústik óńirine arnaıy baspasóz-týry aıasynda kelgen qonaqtarǵa alǵysyn bildirdi.
«Qazaqstannyń kıeli jerleriniń kartasy jobasy aıasynda oblysta 104 kıeli orynnyń tizimi jasaqtalǵan bolatyn. Óńirimizde týrızm salasyn damytý maqsatynda tarıhı oryndardy qalpyna keltirý úshin arnaıy baǵdarlama daıyndalyp, kezeń-kezeńimen iske asyrylyp keledi. Mysaly, aldaǵy ýaqytta Qazyǵurt, Ordabasy taýlaryn jáne ortaǵasyrlyq Otyrar, Saýran, Saıram, Sıdaq, Mártóbe qalashyqtary men Jýantóbe, Qaraspan, Kúltóbe sııaqty ejelgi eldi mekenderdi qalpyna keltirý jumystary bastalmaq. Sonymen qatar, bolashaqta Saıram aýdanyndaǵy «Hanqorǵan» arheologııalyq qalashyǵy ashyq aspan astyndaǵy mýzeıge aınalatyn bolady», - dedi Janseıit Túımebaev.
Qonaqtar tarapynan sóz sóılegen Amerıka Qurama Shtattary «Forbes» jýrnalynyń ókili Aleksandr Lıpovsev alyp, halyqaralyq deńgeıde alǵash ret baspasóz-týryn uıymdastyrǵan oblys ákimine alǵysyn jetkizdi. Munan soń Ulybrıtanııanyń «Opera Now» jýrnalynyń ókili N.Djoýns, Birikken Arab Ámirlikteriniń «The Diplomatic Society» jýrnalynyń ókili Bhana Kırtandar sóz alyp, baspasóz týrynyń joǵary dárejede ótetinine senim bildirdi.
Aıta keteıik, 2017 jyldyń alǵashqy jarty jyldyǵynda Ońtústik Qazaqstan oblysyna 52 850 sheteldik jáne otandyq týrıs saıahattap kelgen. Onyń 3600-i sheteldik qonaqtar. Bul kórsetkish ótken kezeńmen salystyrǵanda 50 paıyzǵa kóp.
Kezdesý sońy erkin formattaǵy pikir almasýǵa ulasty. Sheteldik qonaqtar óńir basshysyna birqatar usynystaryn jetkizip, ońtústiktiń týrızm salasyna nasıhat jóninde az bolsa da úlesterin qosýǵa ýáde etti.
