OQO ákimi órtengen saýda ortalyǵynda boldy
ShYMKENT. QazAqparat - Búgin óńir basshysy Beıbit Atamqulov túnde órtke oranǵan «Isataı» azyq-túlik bazarynyń jaǵdaıymen tanysyp, ondaǵy satýshylarmen kezdesti.
Oblys ákimi órtke oranǵan nysandy qaıta qalpyna keltirý jumystary júretinin aıtyp, sabyrlyq tanytyp otyrǵan satýshylar men saýda ortalyǵynyń basshylyǵyna alǵysyn bildirdi, dep habarlaıdy ákimniń baspasóz qyzmeti. Sondaı-aq, órtti der kezinde aýyzdyqtatyp, shuǵyl jumys atqarǵan oblystyq Tótenshe jaǵdaılar departamenti men qala basshylyǵyna rızashylyǵyn jetkizdi.
Oryn alǵan jaǵdaıǵa baılanysty aımaq basshysy tıisti sala mamandary men qala basshylyǵyna olqylyqtyń ornyn joıyp, tez arada qalpyna keltirý jumystaryn júrgizýdi tapsyrdy. Sonymen qatar, qalpyna keltirý jumystary kedergisiz júrgizilip, shyǵyndardy óteý boıynsha saqtandyrý kompanııasy tarapynan bólinetin qarjy eshqandaı bıýrokratııasyz iske asýyn baqylaýdy jáne turǵyndar jumys ornymen qaıta qamtylýyn nyqtap aıtty.
Eske sala ketsek, Shymkent qalasy 11 móltek aýdany Sh.Ýálıxanov kóshesiniń boıyndaǵy «Isataı» azyq-túlik bazary túngi saǵat 02.00-de shamasynda órtke oranǵan bolatyn. Órt sóndirý jumysyna jalpy 100-den asa jeke quram men 62 ofıtserlik quram, 23 órt sóndirý texnıkasy jumyldyrylyp, tilsiz jaý der kezinde aýyzdyqtaldy. Zardap shekkender men adam shyǵyny joq.
