OQO ákimi óńirdiń úzdik ustazdaryn marapattady
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev óńirdiń ardager ustazdary men bilim salasynyń mamandaryn tól merekelerimen quttyqtap, marapattady, dep habarlaıdy QazAqparat tilshisi.
Jıyn barysynda Janseıit Qanseıituly 9 ardager ustaz ben 26 muǵalimge alǵys hat tabystady.
«Ustazdardyń kásibı merekesi -halyqtyq mereke. Álemdegi ár adamǵa bilim berip, mamandyq tańdaýmen qatar ómir jolyna baǵyt beretin - Ustaz. Endeshe, tól merekelerińiz qutty bolsyn, qurmetti ustazdar! Elbasymyz atap ótkendeı, qazaqstandyqtardyń eshqashan buljymaıtyn eki erejesiniń birinshisi - ulttyq kod pen ulttyq mádenıettiń saqtalyp, rýhanı jańǵyrýdy iske asyrýda ustazdardyń róli birinshi kezekte turǵany anyq. Bala júregine jol taba biletin, rýhanı azyq beretin de - ustaz. Tek naǵyz ustaz ǵana egemen elge laıyqty urpaq tárbıeleı alady. Buǵan oblys ustazdarynyń búgingi tańdaǵy shynaıy eńbekteri dálel. Ustazdarymyzdyń eńbek joly - árdaıym jastarymyz úshin óshpes úlgi!» - dedi Janseıit Túımebaev.
Budan keıin oblys ákimi ustazdarmen taqyryptyq áńgime, suraq-jaýap, jańartylǵan bilim baǵdarlamasy men tájirıbe almasý syndy taqyryptarda áńgimelesti. Ardager ustazdar da óz pikirlerin bildirip, aımaq basshysynyń quttyqtaýyna alǵystaryn bildirdi.
«Bizde bilim berýge barlyq jaǵdaı jasalǵan. Múmkindikter qarastyrylǵan. Balabaqshalar da, mektepter men kolledj, joǵary oqý oryndary da jetkilikti. Myqty mamandarymyz da bar. Tek endi jas urpaqqa sapaly bilim berip, sanaly urpaq tárbıelep shyqsaq bolǵany», -dedi ardager ustaz Saılaýkúl Barahova.
Aıta keteıik, búginde kúngeıde 638 myń oqýshyǵa 70 myńǵa jýyq muǵalim sabaq beredi. Oblys deńgeıindegi bilim salasynda ilgerileýshilik bar. Óńirdiń daryndy oqýshylary respýblıkalyq, halyqaralyq deńgeıdegi bilim saıystarynda júldeger atanýda. Jalpy bilim beretin pánderden respýblıkalyq olımpıadada oblys komandasy birneshe jyl boıy «Eń úzdik olımpıadalyq komanda» atalymy men I, III júldeli oryndardy ıelendi. Bıylǵy tamyz keńesinde tájirıbeli ustazdarǵa páter kiltteri men bilim jáne ǵylym mınıstrliginiń alǵys hattary, qurmet gramotalary tapsyryldy. Sonymen qatar Maqtaaral aýdanyndaǵy «Daryn» mektep-ınternaty men Qazyǵurt aýdanyndaǵy J.Qapparov atyndaǵy fızıka-matematıkalyq mamandandyrylǵan mektep-ınternaty respýblıkadaǵy eń úzdik bilim uıymdarynyń ondyǵyna endi.
