OQO ákimi óńirdegi kınostýdııalardy birigýge shaqyrdy
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev óńirdegi kınorejısserlar men anımatsııa salasynyń mamandarymen kezdesti. Óner maıtalmandarymen bolǵan júzdesýde kúngeıdegi kıno men anımatsııa salasynyń damytý joldary talqylanyp, aldaǵy josparlary aıtyldy, dep habarlaıdy QazAqparat HAA tilshisi.
Aıta keteıik, elimizde kıno ındýstrııasy boıynsha Ońtústik Qazaqstan oblysy ekinshi orynda bolsa, anımatsııalyq fılmder túsirýden kósh basynda. Búginde óńirdegi jeke kınostýdııalardyń 40-tan astam kıno týyndysy men 51 anımatsııalyq fılm kórermenge jol tartqan. Shyǵarmashylyq ókilderimen bolǵan otyrysta óńir basshysy kıno salasy qoǵamnyń ulttyq ıdeologııasyn qalyptastyratyn úlken quraldardyń biri ekenin aıtyp, sońǵy jyldary elimizde kınoǵa jáne onyń sapasyna kóńil bólinip kele jatqanyna toqtaldy.
«Shymkent qalasynda kıno men anımatsııa salasy qarqyndy damyp keledi. Osy baǵyttaǵy jumystardy jandandyrý maqsatynda bıyl qomaqty qarjy bólinýde. Sapaly ári tárbıelik maǵynasy joǵary stsenarıı men kásibı rejısser sapaly fılmniń kepili. Sondyqtan da biz bilikti kadrlar daıyndaý jumystaryn qolǵa alýymyz qajet. Sonymen qatar, Ońtústiktegi kıno stýdııalardy biriktirip, ortaq qundy dúnıe jasap shyǵarýdy usynamyn. Bul qazaq kıno ındýstrııasynyń damýyna septigin tıgizip, respýblıka kóleminde Ońtústiktiń atyn shyǵarýǵa, halyqaralyq deńgeıde Qazaqstandy tanytýǵa múmkindik beredi»,-dedi ákim.
Jıynda zııaly qaýym ókilderi, jazýshy Marhabat Baıǵut pen Nurǵalı Oraz búgingi fılmderdegi til tazalyǵy, taqyryp ózegin ádebıetke negizdeý, oblys ortalyǵynan balalar men jasóspirimder kınostýdııasyn salý týraly tolǵanystaryn aıtty. Sondaı-aq, qalamgerler búginde elimizde otandyq kınony damytýǵa memleketten qoldaýlar kórsetilip jatqanyn tilge tıek etti. Janseıit Túımebaevty osy salany damytýdy qolǵa alyp, kınorejısserlarmen kezdesip otyrǵan alǵashqy ákim ekenin jetkizdi.
«Sizben ótken kezdesý shyǵarmashylyq ujym jumysyna, jańa ıdeıalardyń týýyna serpin beredi. Bizdiń problemamyzben qanyǵyp, qazaq ındýstrııasynyń damýy jaıynda aıtqan oı-pikirińiz biz úshin mańyzdy»,-dedi «Saq» kınostýdııasynyń dırektory, rejısser Nýrıddın Patteev.
