OQO ákimi májilismendermen kezdesti

 ShYMKENT. QazAqparat  - Ońtústik Qazaqstan oblysynyń ákimi Janseıit Túımebaev búgin bir top QR Parlamenti Májilisiniń depýtattary  jáne «Nur Otan» partııasynyń «Bilim» baǵyty boıynsha Komıssııanyń hatshysy Shyńǵys Lepsibaevpen kezdesti. Basqosýda «Prezıdenttiń bes áleýmettik bastamasy» atty halyqqa úndeýindegi elimizdegi bilim sapasyn jaqsartýǵa baılanysty qoıǵan tapsyrmasyn oryndaý jaıy talqylandy, dep habarlaıdy  QazAqparat tilshisi.

Kezdesý barysynda aımaq basshysy óńirdegi bilim salasynyń jaı-kúıimen tanystyryp, qonaqtardy Prezıdent qoıǵan mindetterdi birlesip oryndaýǵa shaqyrdy.

«Elbasy 2022 jylǵa deıin 75 myń oryndyq stýdentter úıin salýdy tapsyrǵany belgili. Osy rette ózderińizdiń tájirıbelerińizben bólise otyryp, jataqhana salý, oqý oryndaryndaǵy tehnıkalyq oqý bazasynyń jaqsarýyna máılinshe yqpal etýge shaqyramyn. Stýdentter jataqhanamen qamtylsa, kóptegen másele sheshilgeli tur. Atap aıtqanda, tómen baǵada jatatyn oryn, jolaqy shyǵyny jáne jastardyń qaýipsizdigi ońynan sheshiledi degen oıdamyn», - dedi Janseıit Túımebaev.

Sondaı-aq, oblys ákimi óńirdegi bilim salasyna engizilgen tsıfrlandyrý júıesindegi jańalyqtarmen de bólisti. Búginde ońtústiktegi birqatar aýdan, qalalarda mektep dırektoryn jumysqa, balalardy balabaqsha men bilim uıalaryna qabyldaý jumystary elektrondyq júıege kóshken. Odan bólek elektrondy kúndelik baǵdarlamasy da alǵash bolyp OQO-da qolǵa alynyp otyr. Nátıjesinde bilim berý salasynda adamı faktorlar azaıyp, qaǵazbastylyq pen sybaılastyqtyń tómendegeni sóz boldy.

Óz kezeginde Májilis depýtaty Ábdimanap Bekturǵanov oblysta atqarylyp jatqan jumystar kóńil qýantatynyn aıtyp, bilim salasyndaǵy máselelerdi sheshý jolynda atqarylyp jatqan jumystardy baıandady. Halyq qalaýlylary oblysta birneshe kún bolyp, oqý oryndardy aralyp jataqhanalardyń jaı-kúıimen tanysatyndaryn jetkizdi.

Aıta keteıik, aımaqta búginde tehnıkalyq jáne kásiptik bilim berý uıymdarynda 74 myńnan asa stýdent bilim alýda. Memlekettik 36 kolledjdiń barlyǵy tolyqtaı ashana jáne býfettermen, al 32-si jatahqanamen qamtamasyz etilgen.