OQO ákimi Májilis depýtattarymen kezdesti
ASTANA. QazAqparat - Ońtústik Qazaqstan oblysynyń ákimi J.Túımebaev óńirge jumys saparymen kelgen QR Parlamenti Májilisiniń depýtattarymen kezdesti, dep habarlaıdy ákimdiktiń baspasóz qyzmeti.
Ońtústik Qazaqstan oblysyna saılaýshylarmen kezdesý úshin arnaıy jumys saparymen kelgen QR Parlamenti Májilisi depýtattary -B.Jylqyshıev, B.Ospanov, A.Smaǵulov, B.Ertaev, M.Mahambetov pen Ý.Qaınazarov.
Kezdesýde oblystyń áleýmettik-ekonomıkalyq damýy men halyqtyń turmystyq jaǵdaıy, aýyldyq jerdegi jumyssyzdyqty joıý jaıy sóz boldy.
Óz kezeginde aımaq basshysy túrli memlekettik baǵdarlamalardyń oblysta óz deńgeıinde júzege asyrylyp otyrǵanyn jetkizip, 2016 jyl agrarly aımaq Ońtústik úshin tabysty da jemisti jyl bolǵanyn atap ótti. Máselen, ótken jyldyń 11 aıynda ónerkásip kásiporyndarymen 710,6 mlrd. teńgeniń ónimi ónidirilse, aýyl sharýashylyǵynyń jalpy ónim kólemi 415,8 mlrd. teńgeni quraǵan. Bul ótken jylǵymen salystyrǵanda 3 paıyzǵa artyq. Al ónerkásip ónimin óndirýde oblys respýblıkada 4-oryndy ıelenip otyr.
Aıta ketý kerek, bıylǵy jyldyń taǵy bir jetistigi ol ekonomıkany ártaraptandyrý, bilim men densaýlyq salasyn órkendetý, óndiriske joǵary tehnologııalardy engizý maqsatynda atalǵan sala mamandary ıaǵnı, 110 adam tegin Túrkııa Respýblıkasynda tájirıbe almasyp, bilimin jetildirip qaıtty.
Basqosýda aımaq basshysy memleketimizdiń shırek ǵasyrlyq mereıtoıy oblysta joǵary deńgeıde toılanǵanyn aıtyp, Táýelsizdiktiń 25 jylynda óńirimizdiń jetken jetistikterine toqtaldy.
«Egemendi el bolǵannan keıingi jyldary óńir halqynyń sany 1 mıllıonnan astam adamǵa kóbeıdi. Elimizdegi árbir besinshi sábı dúnıe esigin ashatyn oblysta ótken jyly bala týý kórsetkishi 80 myńǵa jetti. Osy jyldar ishinde oblys ekonomıkasyna 3,5 trıllıon teńgege jýyq ınvestıtsııa tartyldy. Arnaıy ındýstrıaldy aımaqtar qurylyp, kásipkerlerge qolaıly jaǵdaılardyń barlyǵy jasaldy. Nátıjesinde otandyq taýarlardyń úlesi kóbeıip, shetelderge eksporttala bastady. Al shıek ǵasyr ishinde paıdalanýǵa berilgen 347 medıtsınalyq mekeme, 491 mektep, 1491 balabaqsha el ıgiligine qyzmet etse, oblysymyzda jalpy kólemi 1 mıllıard sharshy metrge jýyq baspana salyndy»,-dedi oblys ákimi.
Elbasynyń bastamasymen júzege asyp otyrǵan baǵdarlamalardyń oryndalýyna qanyqqan halyq qalaýlylary aldaǵy ýaqyttada Ońtústik Qazaqstannyń ósip-órkendeýi jolyndaǵy jobalarǵa barynsha óz úlesterin qosyp, qoldaý bildiretindikterin jetkizdi.
