OQO ákimi Qazaqstan-Ózbekstan bıznes-forýmyna kelgen delegattarmen kezdesti
ShYMKENT. QazAqparat - Búgin Ońtústik Qazaqstan oblysynda 400-ge tarta kásipkerdiń basyn qosqan Qazaqstan-Ózbekstan bıznes-forýmy ótti. Aımaq basshysy Janseıit Túımebaev shara aıasynda kórshi eldiń saýda-ónerkásip palatasynyń tóraǵasy Adham Ikramov pen Syrtqy saýda mınıstriniń orynbasary Sohıb Saıfnazarov bastaǵan delegatsııamen kezdesti, dep habarlaıdy QazAqparat tilshisi.
Qasıetti Ramazan aıynda alǵashqy birlesken iskerlik keńestiń birinshi kezdesýi men bıznes-forýmnyń Ońtústik jerinde ótkizilip jatqanyna qýanyshty ekenin jetkizgen oblys ákimi ózara is-áreketter jaqyn bolashaqta nátıjesin bererine senim bildirdi.
«Bizdiń oblys Ózbekstanmen shekaralas, bul aımaq úshin de búkil el úshin de óte mańyzdy faktor bolyp tabylady. Bul óz kezinde ekonomıkanyń barlyq salalarynda ekijaqty qatynastardy damytýǵa úlken múmkindikter beredi. Ózderińiz biletindeı, Qazaqstan men Ózbekstan memleket basshylary 2018 jyldy Qazaqstandaǵy Ózbekstan jyly dep jarııalady. Búginde bizdiń aımaq pen Ózbekstan arasynda shekaralyq yntymaqtastyq damyp keledi. 2017 jyldyń 15-16 qyrkúıeginde Tashkentte Qazaqstan-Ózbekstan bıznes-forýmy ótti. Atalǵan jıynǵa Ońtústik Qazaqstan oblysynan 150-den astam memlekettik jáne jeke uıymdar qatysty. Forým barysynda Ońtústik Qazaqstan oblysynyń ákimdigi men Tashkent, Syrdarııa jáne Jyzaq oblysy ákimderiniń arasynda saýda-ekonomıkalyq jáne mádenı-gýmanıtarlyq salalarynda ózara túsinistik týraly memorandýmǵa qol qoıylǵan bolatyn»,-dedi aımaq basshysy.
Ózbek delegatsııasymen bolǵan ekijaqty kezdesýde saýda-ekonomıkalyq qarym-qatynasty odan ári damytyp, taýar aınalymdy arttyrýǵa baǵyttalǵan birlesken júıeli jumystardy atqarý jaıy sóz boldy.
Óz kezinde mártebeli meıman Adham Ikramov eki eldiń ǵasyrdan beri jalǵasqan dostyq qarym-qatynasy odan ári jandana túsetinin aıtyp, búgingi ótip jatqan iskerlik jıynda OQO kásipkerleri men ózbekstandyq bıznesmender arasynda saýda-ekonomıkalyq baılanys nyǵaıa túsetinine senimdi ekenin jetkizdi.
Sóz sońynda oblys ákimi ózbek kompanııalarynyń Ońtústik óńirinde bıznesti damytý boıynsha bastamalaryna tolyq qoldaý kórsetýge ázir ekendigin aıtty. Qazirdiń ózinde Ózbekstan Ortalyq Azııadaǵy Qazaqstannyń iri saýda seriktesi sanalady. Aǵymdaǵy jyldyń birinshi toqsanynda elder arasyndaǵy syrtqy saýda aınalymy ótken jyldyń sáıkes kezeńimen salystyrǵanda 50 paıyzǵa artqan. Al jyl sońyna deıin ekijaqty saýdanyń kólemin 3 mıllıard AQSh dollaryna deıin arttyrý josparlanýda.
Aıta keteıik, 11-12 mamyr kúnderi Shymkent qalasynda «Ońtústik Qazaqstan-Ózbekstan» toqyma ónerkásibi ónimderiniń birlesken kórmesi ótken bolatyn. Kórmege toqyma, kıim jáne teriden jasalǵan ónimder, farmatsevtıka, jıhaz, sývenırler, sporttyq taýarlar men oıynshyqtar óndiretin ońtústikqazaqstandyq jáne ózbekstandyq 60-qa jýyq kásiporyndar qatysty.
Foto: Samat Myrzalıev
