OQO ákimi Frantsııanyń Qazaqstandaǵy elshisimen kezdesti
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev Frantsııanyń Qazaqstandaǵy Tótenshe jáne Ókiletti Elshisi Fılıpp Martınemen kezdesti. Kezdesý barysynda taraptar ózara áriptestik mehanızmderin talqylap, eki jaqty qarym-qatynasty damytý jóninde pikir almasty, dep habarlaıdy óńirlik ákimdiktiń baspasóz qyzmeti.
Qazaqstan men Frantsııa arasynda túrli salada tyǵyz baılanys ornap, damyǵanyn aıtqan aımaq basshysy eki eldiń saýda-ekonomıkalyq áriptestik baılanysy boıynsha 5-orynda keletinin atap ótti.
«Qazaqstan negizinen munaı, metall men metall ónimderin, hımııalyq ónimder, aýyl sharýashylyǵy azyq-túligin eksporttaýda. Al Frantsııadan memleketimiz elektrondy jáne mehınıkalyq jabdyqtar, tutynýshylyq taýarlar, dári-dármek pen kosmetıka, avtokólikter, taǵam ónimderi men qurylys materıaldaryn ımporttaıdy. Frantsııanyń Qazaqstan ekonomıkasyna 2005 jyldan bastap 2016 jyldyń jartysyna deıin quıǵan qarjysy 12,7 mlrd dollardy qurady. Bizdiń elimizde frantsýz kapıtaly bar 135 kásiporyn jumys isteýde. Olardyń arasynda «Total», «Areva», «Danon», «Vıkat», «Pejo», «Alstom» jáne basqa da kompanııalar bar»,- dedi Janseıit Túımebaev.
Budan bólek, oblys ákimi óńirde ınvestorlarǵa qolaıly jaǵdaı jasalǵanyn atap ótip, Ońtústik Qazaqstan oblysy túrli salada qarym-qatynasty damytýǵa ázir ekenin jetkizdi.
Óz kezeginde frantsýz elshisi OQO men Frantsııa aımaqtary arasyndaǵy ózara tıimdi saýda-ekonomıkalyq, ınvestıtsııalyq, sondaı-aq, mádenı-gýmanıtarly áriptestikti damytýdyń áleýeti zor ekenin aıtty.
«Eki el arasyndaǵy iskerlik qarym-qatynasty odan ári damytý maqsatynda bizdiń aımaqtar arasynda ımport jáne eksporty kóp salalardy anyqtaý baǵytynda birge jumys jasaýdy usynamyn. Sol salalar boıynsha birikken jańa óndiris oryndaryn ashýǵa bolady dep oılaımyn. Biz ózara áriptestigimizdi uzaq merzimde jalǵastyrýǵa senemiz, - dedi Fılıpp Martıne.
Frantsııa búgingi tańda damyǵan ındýstrıaldy-agrarly el sanalady. Bul el óndiristik ónerkásip kólemi boıynsha álemde aldyńǵy qatarda keledi. Máselen, óńdeý ónerkásibiniń mashına jasaý, avtokólik jasaý, elektr-tehnıkalyq jáne elektrondy óndiris, avıatsııa, keme jáne stanoktar jasaý sekildi salalary jaqsy damyǵan. Sondaı-aq, Frantsııa - álemdegi eń iri hımııalyq jáne munaı hımııalyq ónimder, qara jáne tústi metall shyǵarýshy memlekettiń biri sanalady.
Ońtústikke jasaǵan sapary barysynda Frantsýz elshisi men Frantsýz alıansy prezıdentiniń qatysýymen Frantsýz alıansynyń ınaýgýratsııasy ótedi dep josparlanýda. Elshi buǵan qosa oblystaǵy ýran óndirý kásiporyndarynyń jumysymen tanysatyn bolady.
