OQO ákimi EQYU Parlamenttik assambleıasynyń tóraǵasymen kezdesti
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev Eýropadaǵy qaýipsizdik jáne yntymaqtastyq uıymy Parlamenttik Assambleıasynyń tóraǵasy Krıstın Mýttonenmen kezdesti, dep habarlaıdy ákiminiń baspasóz qyzmeti.
«Eýropadaǵy qaýipsizdik jáne yntymaqtastyq uıymy - qaýipsizdik máselelerimen aınalysatyn álemdegi eń iri óńirlik uıym. Ol búginde Soltústik Amerıkada, Eýropada, Ortalyq Azııada mıllıardtan astam adam ómir súrip jatqan 56 memlekettiń basyn qosyp otyr. Bul uıymǵa qatysýshy memleketterdi ortaq qundylyqtar, ortaq maqsattar men ortaq mindetter biriktiredi, bárinen buryn - osy óńirdi anaǵurlym qaýipsiz, anaǵurlym órkendegen óńirge aınaldyrýǵa degen umtylys biriktiredi»,- dedi Janseıit Qanseıituly.
Aıta keteıik, Eýropadaǵy qaýipsizdik jáne yntymaqtastyq uıymy beıbitshilik pen qaýipsizdikti nyǵaıtýǵa, adamnyń negizgi bostandyqtary men quqyqtaryn qamtamasyz etýge baǵyttalǵan mindetterge arqa súıeıdi. Qaýipsizdik aıqyndamasy retinde shekaralardyń qorǵalýy, áskerı qaterdiń tóndirilmeýi, saıası jáne ekonomıkalyq turaqtylyq, adam quqyqtarynyń saqtalýy, qorshaǵan ortany qorǵaý aldymen qarastyrylady.
«Ońtústik Qazaqstan oblysynyń qonaqjaı halqyna alǵysym sheksiz. Aldaǵy ýaqytta Eýropadaǵy qaýipsizdik jáne yntymaqtastyq uıymy men Ońtústik Qazaqstan oblysy ákimdiginiń ekijaqty qarym-qatynasy jan-jaqty damıdy dep senemin»,- dedi Eýropadaǵy qaýipsizdik jáne yntymaqtastyq uıymy Parlamenttik Assambleıasynyń tóraıymy Krıstın Mýttonen.
Mártebeli qonaq ońtústiktegi jumys sapary barysynda óńirdegi etnomádenı birlestikterdiń bastamasymen boı kótergen «Qazaq eline myń alǵys!» monýmentimen, «Qazaqstan halqy Assambleıasy» ǵımaratyndaǵy qazaqtyń ulttyq qolóner buıymdarynyń kórmesimen tanysady dep josparlanýda.
