OQO ákimi dinı konfessııalardyń basshylarymen kezdesti
Kezdesýde sóz alǵan óńir basshysy merekeniń mańyzdylyǵyna toqtalyp, oblystaǵy dinı konfessııalardyń ózara yntymaq-birligi men qoǵamdaǵy rólin sóz etti.
«1992 jyly 18 qazan kúni Almaty qalasynda Búkilálemdik Rýhanı kelisim kongresiniń 1-shi sessııasy ótken bolatyn. Sol kongreste qaqtyǵystar men janjaldarǵa shekteý qoıý, tatýlyqqa talpyný, jaqyn adamdarǵa qaıyrymdylyq pen járdem jasaý týraly manıfest qabyldanǵan-tyn. Sodan beri jyl saıyn bizdiń elimizde 18 qazan - Rýhanı kelisim kúni merekesi atalyp ótilýde. Elbasynyń sarabdal saıasatynyń arqasynda búginde elimiz álemge yntymaq pen birligi jarasqan, kop konfessııaly memleket retinde tanylyp otyr», - dedi Janseıit Qanseıituly.
Kezdesý barysynda sóz alǵan Qazaqstan musylmandary dinı basqarmasynyń Ońtústik Qazaqstan oblysy boıynsha ókil ımamy Ahmetjan Kerimbekov óńirimizdegi dinı konfessııalardyń yntymaq-birligine toqtaldy.
«Qazaqta «Baılyq baılyq emes, birlik baılyq» degen ataly sóz bar. Osy sózdiń astarynda talaı mán-maǵyna jatyr. Oblysymyzda 18 qazan - Rýhanı kelisim kúni merekesi jyl saıyn joǵary deńgeıde atalyp ótilýde. Elbasymyzdyń baǵyt-baǵdarynyń arqasynda túrli dinı konfessııa ókilderi tatý-tátti, yntymaqta ymyralasyp, ǵumyr keship jatqan jaǵdaıy bar»,- dedi Ahmetjan Piráliuly.
Munan soń Shymkent qalasyndaǵy Svıato-Nıkolskıı kafedraldyq soborynyń dinı qyzmetshisi Aleksandr Mogılevskıı men «Shymkent qalasynyń evreı qaýymy» jergilikti dinı birlestiginiń jetekshisi Zelık Mýrdýhaevter dinı birlestikterdiń qoǵam aldyndaǵy jaýapkershiligin sóz etti. 
Kezdesý sońynda oblys ákimi konfessııa basshylaryna merekege oraı alǵys hattar men syı-sııapat tabys etti. Sondaı-aq «Rýhanı kelisim kúnine» oraı Ońtústik Qazaqstan oblysy ákiminiń kýbogy úshin dinı konfessııalar arasynda kishi fýtboldan ótken týrnırdiń jeńimpazy oblystyq meshit ujymyna oblys ákiminiń kýbogy tabystaldy. 
