OQO ákimi balalar úıiniń tárbıelenýshilerine EKSPO bıletterin syıǵa tartty
ShYMKENT. QazAqparat - Ramazan aıynyń alǵashqy kúninde QR Din isteri jáne azamattyq qoǵam mınıstri Nurlan Ermekbaev pen Ońtústik Qazaqstan oblysynyń ákimi Janseıit Túımebaev Shymkent qalasyndaǵy №3 balalar úıiniń tynys tirshiligimen tanysty, dep habarlaıdy QazAqparat HAA tilshisi.
Mınıstr balalar úıine sońǵy úlgidegi medıtsınalyq fızıokabınetke arnalǵan «Bınom» medıtsınalyq qurylǵysyn syıǵa tartsa, óńir basshysy 20 tárbıelenýshige «EKSPO -2017» kórmesiniń bıletterin tartý etti.
«Munda balalardyń eshteńege alań bolmaı ósýine, oqýyna, jalpy azamat bolyp qalyptasýlaryna barlyq jaǵdaı jasalynýy tıis. Sondyqtan mekeme qyzmetkerlerine úlken jaýapkershilik artylady»,- dedi oblys ákimi Janseıit Qanseıituly.
Ol sondaı-aq balalardyń Astanadaǵy halyqaralyq kórmege baryp-qaıtý shyǵyndaryn da óz esebinen júzege asyratynyn jetkizdi.
Aıta keteıńk, bul mekeme jyl basynan beri QR Din isteri jáne azamattyq qoǵam mınıstrliginiń qamqorlyǵyna alynǵan bolatyn. Qazirgi tańda munda 3 jastan 11 jasqa deıingi 68 jetim jáne ata-anasynyń qamqorlyǵynsyz qalǵan bala tárbıelenedi. Balalar úıinde oqý-tárbıe jumysy tolyǵymen qazaq tilinde júrgiziledi. Onda bı, vokal, qol óner úıirmeleri jumys isteıdi. Úıirmege 58 bala qatysady. Sabaqtan tys ýaqytta túrli is-sharalar uıymdastyrylady. Balalar oqý quraldarmen tolyq qamtylǵan.
