OQO ákimi ardaqty analardy marapattady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev óńirdiń ardaqty analaryna arnalǵan merekelik sharada qart analar men altyn alqa ıegerlerin marapattady. Aımaq basshysy altyn qursaqty analardy tól merekesimen quttyqtap, júrekjardy tilegin arnady, dep habarlaıdy QazAqparat tilshisi.
«8 naýryz Halyqaralyq áıelder kúni - shýaqty kóktemniń eń izgi, meıirim men súıispenshilikke toly merekesi. Aıaýly analardyń názik júregi súıgen jaryna, perzentine, týǵan jeri men Otanyna degen mahabbatqa toly. Ana - ulyq esim, qursaǵynan ǵalym da, aqyn da, batyr da taraıdy. Ońtústik - ondaı kıeli analarǵa kende emes. Búginde óńirimizde kóp balaly analarymyz 98 600-ge jetti. Olardyń 4 myńǵa jýyǵy - «Batyr analar», 16 myńnan astamy - «Altyn alqa», al 43 myńdaıy - «Kúmis alqa» ıegeri. Osyndaı batyr analarymyz, ardaqty apalarymyz aman, ǵumyrlary uzaq bolsyn», - dedi Janseıit Qanseıituly.
Saltanatty sharada oblys basshysy 35 jastaǵy 3 birdeı batyr anany medalmen marapattady. Olardyń qatarynda 7 ul-qyzdy tárbıelep otyrǵan Alıma Bekbosynova, Manat Bımenova, Roza Qudaıbergenova syndy jas batyr analar bar.
Osy kúni Janseıit Qanseıituly sondaı-aq óńirge eńbegi sińgen ardager ana, oblystyń qurmetti azamaty, QR bilim berý isiniń úzdigi Álipova Klara Tólendiqyzyn quttyqtap bardy. Aımaq basshysy eli úshin erinbeı eńbek etken anaǵa qajymas qaırat, uzaq ǵumyr tiledi. Merekege oraı syı-syıapat jasap, gúl shoqtaryn syılady. Ardager ustaz, belgili qoǵam qaıratkeri Klara Tólendiqyzy oblys basshysyna rızashylyǵyn bildirip, isine bereke tiledi.
Aıta keteıik, Klara Tólendiqyzy 1937 jyly týǵan. Eńbek jolyn ınternat pansıotynda tárbıeshi bolyp bastaǵan. Negizgi mamandyǵy orys tili men ádebıeti jáne tarıh pániniń muǵalimi. Partııa salasynda uzaq jyldar boıy tabandy eńbek etken. «OQO Azamattyq alıansy» assotsıatsııasynyń prezıdenti, «Kemel» áıelder klýbynyń tóraıymy qyzmetterin atqarǵan. «Baýyrmal» syılyǵynyń ıegeri.
