OQO ákimi Arbat salýǵa qatysty halyqtyń usynysyn tyńdady
ShYMKENT. QazAqparat - Ońtústik Qazaqstan oblysynyń ákimi J.Túımebaev Qoshqar ata, eski qalashyq jáne Shymkent qalasynda salynatyn arbattardyń jobalarymen tanysty. Shahar ortalyǵynan Arbat salý boıynsha halyqtyń usynys pikirlerin tyńdady , dep habarlaıdy QazAqparat tilshisi.
Buǵan deıin óńir basshysy Shymkent qalasyndaǵy tarıhı mańyzǵa ıe nysandary men Arbat salýǵa bolatyn kóshelerdi aralap shyǵyp, týrıstik jobalardy júzege asyrý boıynsha sala mamandaryna birqatar tapsyrmalar bergen bolatyn. Solardyń biri «Qoshqar ata» ózeniniń boıynan saıabaqtar men alleıalar, eski qalashyq mańynan ashyq aspan astyndaǵy murajaı salý jumystary edi. Mamandar joba boıynsha atalǵan aýmaqtardaǵy birqatar jeke turǵyn úıler, komertsııalyq nysandar men jekeshelendirilgen jalpy aýmaǵy 5,55 gektardy quraıtyn jer ýchaskesin memleket muqtajyna alý jumystaryn atqarý kerektigin jetkizdi. Oblys ákimi sharaǵa qatysqan jergilikti turǵyndardy aldaǵy ýaqytta atqarylatyn osyndaı sharýalarǵa túsinistikpen qaraýǵa shaqyrdy.
«Shymkent qalashyǵynyń kóne arheologııalyq keshenin murajaılandyrý maqsatynda bıyl jyly birqatar jumystardy atqarýymyz tıis. Onyń ishinde, belgilengen jospar boıynsha 118 nysan memleket muqtajyna alý jumys júrgiziledi. Bul nysandar Qarasý ózeniniń boıynda 30 metr qashyqtyqta ornalasqan. Osyndaı jaqsy jańalyqtarmen bólisip ózderińizben talqylaýdy jón kórip otyrmyz. Sizderdi ońtaıly oı-pikirlerińizdi ortaǵa salýǵa shaqyramyn», - dedi Janseıit Qanseıituly.
Óz kezeginde qoǵam belsendileri men qala turǵyndary atqarylyp jatqan sharýalarǵa halyq dán rıza ekendikterin jetkizdi. Ásirese, qaraýsyz qalǵan ózen boıyndaǵy abattandyrý jumystary kóptiń kóńilinen shyqqan.
«Búginde ákimdiktiń aralasýymen Qoshqar ata ózeniniń máselesi Ordabasy alańyna deıin sheshildi dep aıtýǵa bolady. Endigi problema Eski qalashyq mańyndaǵy jeke turǵyn úıler bolyp otyr. Keńes úkimeti kezinde qazirgi 21 móltekaýdanda jer úıler bolǵan. Olar kezeń-kezeńimen súrilip, ornyna kópqabatty turǵyn úıler boı kóterdi. Táýelsizdik alǵan jyldary bul jumystar toqtap qaldy. Menińshe osyndaı tásilmen Eski qalashyqty da jańartyp alýymyz kerek», - dedi ólketanýshy Keńes Ismaılov.
Sondaı-aq, jıynda sóz alǵan qoǵam belsendisi Janysbek Ótegen saıabaqtar men arbattarǵa qazaq halqynyń qalyptasýy men damýyna úles qosqan tulǵalarǵa arnap eskertkish qoıýdy usyndy. Óńir basshysy aıtylǵan usynys-pikirler aldaǵy ýaqytta eskeriletinin jetkizdi.
