OQO ákimi álem chempıony Qaırat Eralıevke 4 mln teńge tabys etti
ASTANA. QazAqparat - Búgin Shymkent qalasynda ótken «Densaýlyq-2017» festıvali aıasynda Ońtústik Qazaqstan oblysynyń ákimi Janseıit Túımebaev Germanııanyń Gambýrg qalasynda ótken bokstan Álem chempıonatynyń altyn júldegeri Qaırat Eralıev pen qola medal ıegeri Jomart Erjandy jeńisterimen quttyqtap, syı-qurmet kórsetti, dep habarlaıdy oblystyq ákimdiktiń baspasóz qyzmeti.
Nemis jerinde ótken dúbirli dodada elimizdiń qorjynyna jalǵyz altyndy alyp berip, kók týymyzdy kókke jelbiretken álem chempıony Qaırat Eralıevke oblys ákimi 4 mıllıon teńgeniń sertıfıkatyn tabys etti. Al, álem chempıonatynyń qola medalin enshilegen Jomart Erjanǵa 1 mıllıon teńgeniń sertıfıkatyn tapsyrdy. 
Sonymen birge, oblys ákimi Qaırat Eralıevtiń jeke bapkeri, bokstan Qazaqstan quramasynyń bas jattyqtyrýshysy Myrzaǵalı Aıtjanovqa 4 mıllıon teńge, al úshinshi oryn ıelengen boksshymyzdyń jeke bapkeri Núrken Andasovqa 1 mıllıon teńge qarjylaı syılyq tabystady.
Óńir basshysy jeńimpaz sportshylarymyzdyń álem chempıonatynda kórsetken erligi jastardy otanshyldyqqa tárbıelep, sportqa degen qyzyǵýshylyǵyn arttyrýǵa septigin tıgizetinin aıtty.
«Sizder álemdik dodada el namysyn qoldan bermeı, bıik tuǵyrdan kórindińizder. Aldaǵy ýaqytta da osy baǵyttaryńnan taımaı, bıik belesterdi baǵyndyra berýlerińe tilektestik bildiremin», - dedi Janseıit Qanseıituly.
Qaırat pen Jomart - bilikti basshy Balǵabaı Elshıev basqaratyn oblystyq joǵary sport sheberligi mektebiniń saıypqyrandary. Jigitterdiń chempıonatqa daıyndalýyna oblystyq dene shynyqtyrý jáne sport basqarmasynyń basshysy Álibek Nurtaev ta bar jaǵdaıdy jasady. QR Boks federatsııasynyń da eńbegi mol. Senim men eńbek aqtalyp, órenderimiz kók týdy bıikke órletti. 
