OQO ákimi 20 jasqa «Úzdik jastar premııasyn» tabystady
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev «Halyqaralyq stýdentter kúni» merekesine oraı uıymdastyrylǵan oblys jastarynyń baly men «Úzdik jastar premııasy» saltanatty is-sharasyna qatysty, dep habarlaıdy oblystyq ákimdiktiń baspasóz qyzmeti.
Jastardyń arasynda mádenıettilik pen ádeptilikti qalyptastyrý maqsatynda uıymdastyrylǵan keshte oblys ákimi sóz alyp, barsha ońtústikqazaqstandyq stýdent jastardy búgingi merekemen quttyqtap, ystyq lebizin jetkizdi.
«Elimizde qaı kezde bolmasyn jastarǵa, jas mamandarǵa úlken senim artylyp, jastardyń ósýine kóptegen jaǵdaılar jasalýda. Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasy ulttyq rýhanııattyń jańa tuǵyry desek, ony júzege asyrý bárimizdiń aldymyzda turǵan basty maqsat. Búginde Ulystyń uıytqysy atanǵan - óńirimizdi jan-jaqty damytý jolynda jigerli jastarymyzdyń úlesi bar, áli de kóp eńbek etip, oblystyń damýyna súbeli úles qosatyndaryńyzǵa senimdimin. Sizderge tek eńbekte ǵana emes, Táýelsiz elimizdiń maqtanyshyna aınalyp, barlyq salalarda úlken jetistikterge jetýlerińizge shyn júrekten tilektespin»,-dedi ákim.
Munan bólek, oblys ákimi jyl boıy túrli salalarda ózindik úles qosyp júrgen 20 kóshbasshy jasqa 15 nomınatsııa boıynsha «Úzdik jastar premııasyn» tabystady.
Saltanatty keshte arnaıy daıyndyqtan ótken 22 jup bı keshine arnalǵan saltanatty kıimderin kıip, vena valsyn bıledi. Olar bı alańyn naǵyz venalyq ertegi álemine aınaldyrǵandaı áser qaldyrdy.
Іs-sharaǵa oblystyq máslıhat depýtattary, joǵary jáne arnaýly orta oqý oryndarynyń basshylary men belsendi jastar, jumysshy jastar uıymy men erikti jastar jalpy sany 500-den astam adam qatysty.
Sonymen qatar, mereke qarsańynda búgin «Jastar resýrstyq ortalyǵy» ǵımaratynda «Ońtústik» jastar teatrynyń talantty óner ıeleri ózbek dramatýrgy H.Hýrsanovtyń «Óldik te, qurmetti boldyq» atty tárbıelik máni zor komedııalyq janrdaǵy qoıylymyn usyndy.
Aıta keteıik, oblystaǵy 12 joǵary oqý ornynda 44 860 stýdent, 91 orta, arnaýly oqý oryndary men kolledjde 70 885 stýdent bilim alady. ıAǵnı, óńirde 115 myńnan astam stýdent bar.
