OQO ákimdiginde 10 aıdyń nátıjesi boıynsha jıyn ótti
ShYMKENT. QazAqparat - Búgin Ońtústik Qazaqstan oblysynyń ákimdiginde aýdan, qala ákimderimen selektorlyq jıyn ótti. Óńir basshysy Janseıit Túımebaevtyń tóraǵalyǵymen ótken májiliste oblys ákiminiń orynbasarlary, ákim apparaty jáne oblystyq basqarma basshylary qatysty, dep habarlaıdy OQO ákiminiń baspasóz qyzmeti.
Kún tártibinde, 2016 jyldyń 10 aıynyń qorytyndysy men bıýdjettiń oryndalýy jáne «Nurly jol» baǵdarlamasynyń iske asýy týraly máseleler qaraldy.
Birinshi másele boıynsha sóz alǵan oblystyq qarjy basqarmasynyń basshysy K.Mendebaev osy jyldyń 10 aıynda jergilikti bıýdjetke túsetin salyqtar men basqa da túsimderdiń jospary 108,2%-ǵa oryndalǵanyn nemese 6,6 mlrd.teńge artyq túskenin málim etti.
Onyń aıtýynsha, esepti kezeńde barlyq aýdan, qalalarda kirister boıynsha jospar asyra oryndalǵan. Dese de, birqatar aýdan, qalalar boıynsha keıbir jobalar aıasynda ıgerilmegen qarjylar bar. «Bul óz kezeginde, bıýdjettik baǵdarlamalarda qaralǵan shyǵyndardy ýaqtyly qarjylandyrýǵa keri áserin tıgizedi», dedi ol.
Basqarma basshysy oblys boıynsha bıýdjet qarjysy 97 paıyzǵa ıgerilgenin aıtyp, «Nurly jol», «Jumyspen qamtý 2020», «Bıznestiń jol kartasy 2020» baǵdarlamalaryna bólingen qarjylardyń ıgerilýine kúndelikti baqylaýdy kúsheıtý qajettigine toqtaldy.
Jıynda «Nurly jol» baǵdarlamasynyń oryndalýy boıynsha málimdeme jasaǵan oblystyq qurylys basqarmasynyń basshysy S.Polatov Ulttyq qor esebinen oblysta júrgiziletin 50 nysan qurylysyna 20 194,7 mln. teńge qarjy bólingenin jetkizdi. Atap aıtqanda, olar - 26 mektep, 1 balabaqsha, 11 ınfraqurylym, 11 turǵyn-úı, 1 jataqhana nysandarynyń qurylysy.
Sonymen birge, S.Polatov bilim berý salasy boıynsha osy jyly 17 nysan qurylysynyń 5-ýi josparlanǵan óndiristik kesteden keshigip jatqanyn jetkizdi. Olar - Saıram, Saryaǵash, Shardara aýdandary men Shymkent qalasyndaǵy mektepter.
Sonymen qatar, baıandamashy Shymkenttegi «Turǵynúıqurylysjınaqbanki» AQ arqyly salynyp jatqan kredıttik 11 úıdiń jáne «Jumyspen qamtý-2020» baǵdarlamasy boıynsha ákimshilik-iskerlik ortalyǵyndaǵy 9 qabatty 1 jataqhananyń qurylysy týraly aıtyp, jumystar josparly kestege saı júrgizilip jatqanyn jetkizdi.
Óz kezeginde, salaǵa qatysty sóz alǵan oblystyq energetıka jáne turǵyn úı - kommýnaldyq sharýashylyq basqarmasynyń basshysy M.Maraıym bólingen 4 048297,0 myń teńgeniń 97 paıyzy ıgerilgenin habarlady. Al aqshany ýaqtyly uqsatpaǵan nysandar - «Bıznestiń jol kartasy 2020» baǵdarlamasy boıynsha jumystar júrgizilip jatqan Shymkenttegi Tassaı ındýstrıaldyq aımaǵynyń qurylysy men Maqtaraldaǵy logıstıkalyq ortalyǵynyń ınjenerlik kommýnıkatsııa qurylysy, Túlkibastaǵy demalys aımaǵyn gazben qamtamasyz etý jaıy jáne Túrkistandaǵy logıstıkalyq ortalyqtyń qurylysy eken.
Jıyndy qorytyndylaǵan aımaq basshysy J.Túımebaev qarjyny kestege sáıkes ıgere almaı otyrǵan aýdan, qala ákimderi jumysty barynsha jedeldetýi qajettigin aıtyp, onyń sebebin naqtylap, túsinikteme berýi kerektigin tapsyrdy. Sóz sońynda Janseıit Qanseıituly mindetti tapsyrmalardy oryndamaǵan shendilerdiń tártiptik jaýapkershilikke tartylatynyn da eskertti.
