OQO ákimdigi Reseıdiń iri saýda keshenimen áriptestikti arttyrmaq
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev Reseıdiń «Fýdsıb» kóterme jáne bólshek saýda kesheniniń ınvestory Dmıtrıı Tereshkov bastaǵan delegatsııamen kezdesti.
Mundaǵy maqsat - óńirimizdegi aýyl sharýashylyq taýar óndirýshileriniń ónimderin Reseıge eksporttaý arqyly eki el arasyndaǵy saýda-ekonomıkalyq qatynastardy damytý, dep habarlaıdy óńir basshysynyń baspasóz qyzmeti.
Kezdesý barysynda taraptar aýyl sharýashylyq taýar óndirýshileriniń ónimderin eksporttaý, taýar óndirýshilerge qoldaý men keshendi qyzmet kórsetý jaıyn ortaǵa saldy.
«Búgingi kezdesý eki el arasyndaǵy saýda-ekonomıkalyq qatynastardy damytyp, ózara yntymaqtastyqty arttyra túsedi dep senemin. «Fýdsıb» kóterme jáne bólshek saýda kesheniniń áleýetin ońtústikqazaqstandyq taýar óndirýshiler tıimdi paıdalaný maqsatynda birqatar mańyzdy máselelerdi talqylaıtyn bolamyz. Bul kezdesý ekijaqqa da tıimdi bolatynyna senimim mol», - dedi Janseıit Qanseıituly.
Jalpy aýmaǵy 80 myń sharshy metrdi quraıtyn «Fýdsıb» kóterme jáne bólshek saýda kesheni Reseıdiń Novosibir qalasynda ornalasqan. Saýda keshenine TMD elderi men Reseıdiń ózge de aımaqtarynan azyq-túlik taýarlary tasymaldanady. Atalǵan saýda ornynda salqyndatqysh qoımalar men demalys keshenderi, meıramhanalar men 200 aýyr júk kóligine arnalǵan arnaıy turaq jumys isteıdi. Jylyna munda 120 myń tonnaǵa jýyq kókónis pen jemis-jıdek saýdalanady. Atalǵan keshenniń ınvestıtsııalyq quny - 5,8 mlrd teńgeni quraıdy.
Aıta keteıik, ótken jyly «OŃTÚSTІK» aımaqtyq ınvestıtsııalyq ortalyǵy men «Fýdsıb» saýda kesheni arasynda ekijaqty yntymaqtastyq týraly memorandýmǵa qol qoıylyp, «RIC ON EXPORT» baǵdarlamasy iske qosylǵan bolatyn. Jobanyń basty maqsaty - aýylsharýashylyq ónimderin óndirýshileriniń eksporttyq áleýetin damytý. Atalǵan kelisim aıasynda Novosibir qalasyna ońtústikte óndirilgen aýyl sharýashylyǵy ónimderi jóneltilgen bolatyn. Ekijaqty kelisimge saı búginde «OŃTÚSTІK» AIO «RIC ON EXPORT» aýylsharýashylyq óndirýshileriniń eksporttyq áleýetin damytý baǵdarlamasynyń sheńberinde «RIC ON KORME» atty turaqty kórme-jármeńke uıymdastyrylýda.
