OQO ákimdigi men Almaty ákimdigi arasynda ózara yntymaqtastyq týraly memorandýmǵa qol qoıyldy
ALMATY. QazAqparat - Búgin Almatyda «Rixos Almaty» qonaq úıinde OQO jáne Almaty taýar óndirýshileriniń ózara yntymaqtastyq jaıly forýmy ótti. Shara barysynda Almaty ákiminiń orynbasary Erlan Áýkenov pen OQO ákiminiń orynbasary Saparbek Tuıaqbaev qos aımaqtyń taýar óndirýshileriniń arasynda ózara yntymaqtasty nyǵaıtý jaıynda memorandýmǵa qol qoıdy.
Kelisimge sáıkes OQO aýyl sharýashylyǵy ónimin óndirýshileri Almatyǵa deldalsyz tikeleı ónimderin ákeletin bolady. Almaty ákimdigi óz kezeginde OQO fermerlerine qosymsha satý alańdaryn, kóliktik-logıstıkalyq ortalyqtardy qalyptastyrýǵa múmkindik jasaıdy. Sáıkesinshe, OQO-dan kelgen ónimderdiń baǵasy tutynýshyǵa 25 paıyzǵa arzan baǵamen satylady.
«OQO-da A jáne B klasty qoımalardyń tapshylyǵy bilinedi. 500 sharshy shaqyrym aýmaq qajet bolyp otyr. 2020 jylǵa taman osyndaı kelisimderdiń arqasynda qoımalar kólemi 1 mln sharshy kılometrge jetetin bolady. Osynyń arqasynda eksport, reeksporttyq potentsıal arta túsedi», - dedi «Shymkent» ÁKK basqarma basshysy Talǵat Alpysbaev.
Almaty ákiminiń orynbasary Erlan Áýkenovtyń aıtýynsha, Almaty men OQO aımaqtary jalpy aımaqtyq ónim óndirýde kóshbasshy bolyp otyr.
«Almaty qalasynyń respýblıkalyq saýda qyzmeti kóleminde alatyn úlesi 45 paıyz, EDB qarjylyq aǵymynyń 70 paıyzy Almaty arqyly ótedi. Bul eki aımaq kásipkerleriniń qarym-qatynasyn qos baǵytta damytýǵa múmkindik beredi. Óz kezeginde OQO-nyń ozyq tájirıbesin paıdalana alamyz», - dedi Erlan Áýkenov.
