OQO ákimdigi membaǵdarlama arqyly kómekter alýdyń sharttaryn halyqqa jarııalaıtyn bolady
ShYMKENT. QazAqparat - Ońtústik Qazaqstan oblysynyń ákimdigi aldaǵy ýaqyttarda memlekettik baǵdarlamalardy tolyqqandy túsindirý men ol arqyly kómekter alýdyń tártibin jáne sharttaryn halyqqa jarııalaıtyn bolady. Búgingi shyǵarylym «Agrobıznes 2020» baǵdarlamasy arqyly aýyl sharýashylyǵy daqyldaryn egýdi gektarlyq sýbsıdııalaý taqyrybyna arnalady.
QR Agroónerkásiptik kesheni sýbektileriniń básekege qabilettiligin arttyrý úshin jaǵdaılar jasaý maqsatynda «Agrobıznes 2020» baǵdarlamasy qurylǵany belgili. 2013-2020 jyldarǵa arnalǵan memlekettik baǵdarlama salany qoldaý maqsatynda túrli baǵyttardy qamtıdy. Atap aıtqanda, olar:
- aýyl sharýashylyǵy daqyldaryn egýdi gektarlyq sýbsıdııalaý;
- jemis - jıdek jáne júzimdi otyrǵyzýdy qoldaý;
- tuqym sharýashylyǵyn qoldaý;
- mınerıaldy tyńaıtqyshtardy sýbsıdııalaý;
- gerbıtsıdterdiń, bıoagentter men bıopreparattardyń qunyn arzandatý;
- mal sharýash-nyń ónimdiligi men sapasyn aryttyrý, mal tuqymyn asyldandyrý;
- ınvestıtsııalyq sýbsıdııa;
- aýyl sharýashylyǵy ónimin tereńdete qaıta óńdeý shyǵyndaryn ishinara óteý;
- kredıt/lızıng paıyzdyq ústem aqysyn sýbsıdııalaý men AÓK sýbektilerin qarjylaı saýyqtyrý;
- aǵyn sý jetkizip berý qunyn ishinara sýbsıdııalaý.
Aýyl sharýashylyǵy daqyldaryn egýdi gektarlyq sýbsıdııalaý daqyl túrine baılanysty. Máselen, dándik júgeri úshin gektaryna 25 000 teńge berilse, ónerkásiptik úlgidegi tamshylatyp sýǵarý júıesin qoldanyp ósirilgen júgerige 80 000 teńge, kúrishke 30 000 teńge, maıly daqyldar (maqsary, kúnbaǵys) 1 tonna ónimge 8 000 teńge, kartopqa 18 000 teńge, kókónis-baqshaǵa 18 000 teńge, ónerkásiptik úlgidegi tamshylatyp sýǵarý júıesin qoldanyp ósirilgen kókónis-baqshaǵa 80 000 teńge, maqta 15 000 teńge, maqta 1 tonna ónimge 6 000 teńge, ónerkásiptik úlgidegi tamshylatyp sýǵarý júıesin qoldanyp ósirilgen maqtaǵa 60 000, jemshóptik daqyldarǵa (jańa jońyshqa) 15 000 teńge, súrlemdik júgerige 9 000 teńge, jaryqty ónerkásiptik jylyjaıǵa (1 aınalymǵa) 5 000 000 teńge, jaryqsyz ónerkásiptik jylyjaıǵa (1 aınalymǵa) 2 500 000, fermerlik jylyjaıǵa (1 aınalymǵa) 1 500 000 beriledi.
