OQO ákimdigi kópqabatty úılerdi jóndeýge 1,2 mlrd teńge jumsamaq
ShYMKENT. QazAqparat - Bıyl Ońtústik Qazaqstan oblysynda kópqabatty 83 túrǵyn úı kúrdeli jóndeýden ótedi. Bul týraly Óńirlik kommýnıkatsııa ortalyǵynda Oblystyq turǵyn úı-kommýnaldyq sharýashylyq basqarmasynyń basshysy Marǵulan Maraıym málim etti, dep habarlaıdy QazAqparat tilshisi.
Basqarma basshysynyń aıtýynsha, bıyl kópqabatty túrǵyn úılerdiń kúrdeli jóndeý jumystaryna 1,2 mlrd teńge qarjy qarastyrylyp otyr. Sondaı-aq, kópqabatty 9 turǵyn úıdiń seısmıkalyq jaǵdaıyn nyǵaıtý úshin qazynadan 453,5 mln teńge qarjy bólý josparlanýda.
«Qazirgi tańda oblys kóleminde 3 518 kópqabatty turǵyn úı bar bolsa, onyń 1393-i, ıaǵnı 39,6 paıyzy kúrdeli jóndeýdi talap etedi. Al 20-synda seısmıkalyq nyǵaıtý qajet. Turǵyn úılerdi kúrdeli jóndeýdiń 2017-2020 jyldarǵa arnalǵan keshendi is-shara josparyna sáıkes, 2020 jylǵa qosymsha 488 kópqabatty turǵyn úıde tıisti jumystar atqarylmaq. Bul baǵytqa 6 mlrd 861 mln teńge baǵyttalýy tıis. Nátıjesinde kúrdeli jóndeýdi talap etetin turǵyn úılerdiń úlesin 39,6 paıyzdan 25,7 paıyzǵa tómendetý kózdelip otyr», - dedi Marǵulan Zulqarnaıuly.
Baspasóz máslıhaty barysynda basqarma basshysy kópqabatty úılerdi jylýmen qamtý máselesine erekshe toqtalyp ótti. Búginde óńirde ortalyqtandyrylǵan jylýmen qamtamasyz etetin 16 jylý berýshi kásiporyn men 1108 kishi qazandyq jumys isteıdi. Jylý qubyrlarynyń jalpy uzyndyǵy 610,1 shaqyrymdy quraıdy. Osy baǵytta sońǵy 3 jylda 5 mlrd teńge kóleminde qarjy bólinip, 153 shaqyrym jylý qubyrlary qaıta quryldy. Atqarylǵan jumystardyń arqasynda qubyrlardyń tozyǵy jetý deńgeıi 51 paıyzdan 35 paıyzǵa tómendetilgen. Qazirgi kezde oblystyń jylý berý barysy shtattyq rejımde ótýde. Barlyq mekemeler qajetti katty jáne suıyq otynmen qamtamasyz etilgen.
Oblys turǵyndaryn kómirmen qamtamasyz etý jaǵdaıyna toqtalǵan Marǵulan Maraıym búginde qatty otynǵa degen suranys 1 mln tonnany quraıtynyn atap ótti. Onyń ishinde turǵyndarǵa qajetti 750 myń, jylyjaılarǵa 250 myń tonna qajet. Búgingi kúni suranystyń 85 paıyzy qamtamasyz etilip, kómir tasymalynyń jumysy jalǵasýda eken.
