OQO: 3 jasar búldirshin jas akrobattar men ıllıýzıonıster saıysynda bas júlde aldy
ShYMKENT. QazAqparat - Halyqaralyq tsırk kúnine oraı Shymkentte «Shynaıy óner - tsırk» atty oblystyq baıqaý bolyp ótti. «Ońtústik tsırk» ujymy uıytqy bolǵan sharaǵa óńirden 11 komanda qatysty. Baıqaýǵa Báıdibek aýdanynan kelgen "Balaýsa" akrobatıkalyq tobynyń quramynda óner kórsetken Erasyl Beısaly jas akrobattar men ıllıýzıonıster saıysyna tústi. 3 jasar búldirshin ónerdegi aǵalarymen birge manejge shyǵyp, bas júldeni jeńip aldy, dep habarlaıdy QazAqparat HAA tilshisi.
Erasyl áli erkin sóıleı almasa da, qımyly shıraq. Asqan eptilik pen sheberlikti qajet etetin tsırk ónerine degen qyzyǵýshylyǵy joǵary. Al, búldirshindi tsırkke baýlyp júrgen Baýyrjan Baqbergenniń aıtýynsha, búginde aýyl balalarynyń arasynda talanttar kóp.
«Úıirme ashqanyma qazir úsh jyldaı boldy. Sol jyldaǵy kórsetip jatqan nátıjemiz óte jaqsy. Endi kishkene aýyl bolǵan soń daıyndalatyn jer bolmady. Qazir salynyp jatyr. Eger sol bitse, odan da jaqsarady degen senimdemiz», - deıdi Baýyrjan Bekbergen.
Baıqaýǵa Saıram aýdanynan kelgen 5 jasar Shershod Mýratjanov ta qatysty. Ol da akrobatıka boıynsha synǵa tústi. Aıtyp óteıik, tasada júrgen talanttardy tanytýdy kózdegen saıys bıyl ekinshi ret uıymdastyrylyp otyr. Baıqaýdy uıymdastyrýshylarynyń aıtýynsha, jyl ótken saıyn onyń deńgeıi artyp keledi. Oǵan dálel, byltyr bul saıysqa jeti komanda qatyssa, bıyl olardyń qatary onnan asqan. Qatysýshylar arasynda tek akrobatıka ónerin meńgergender ǵana emes, ıllıýzııa janrynda da óner kórsetetinder bar.
«Maqsatymyz - tsırk ónerin meńgergen jastardy tartý. Ózimizdiń tsırkti ózimizdiń mamandarmen jasaqtaý. Ónerli ólkemiz ǵoı. Ońtústik-Tsırk mekemesine jas daryndar toptastyryp, olarǵa qoldaý kórsetý, keleshekte kásibı maman retinde shyńdaýǵa jol ashý bolyp tabylady»,-deıdi «Ońtústik tsırk» MKQK-nyń dırektory Arman Álıev.
Saıys qortyndysymen júldegerler "Eń úzdik nómir", "Ekstremaldy nómir", "Eń jas qatysýshy", "Kórermen kózaıymy" nomınatsııalar boıynsha da marapattaldy.
