OQO: 20 myńnan astam turǵyn «Órleý» jobasynyń tıimdiligin kórip otyr
ASTANA. QazAqparat - Ońtústik Qazaqstan oblysyniń ákimi Janseıit Túımebaev Ordabasy aýdanyna jumys saparyn Badam aýylynda ornalasqan «Ordabasy nan» JShS-niń jumysymen tanysýdan bastady, dep habarlaıdy óńirlik ákimdiktiń baspasóz qyzmeti.
Atalǵan seriktestik negizinen zamanaýı úlgidegi túrik tehnologııalaryn paıdalanyp, sapaly un ónimin shyǵarýmen aınalysady. Ónim halyqaralyq deńgeıdegi memlekettik talaptarǵa, al óndiris qondyrǵylary halyqaralyq standartqa sáıkestendirilgen.
Alǵash ret jumysyn 2008 jyldyń 2-toqsanynda bastaǵan seriktestik 2015 jyly óndiris qýattylyǵyn arttyrý maqsatymen dıirmen qurylysyn ulǵaıtyp, túrik tehnologııasymen jańa qondyrǵylar ornatylǵan. Nátıjesinde munda táýligine 450 tonna bıdaı óńdelip, un ónimderi óndiriledi. Bul jobanyń jalpy ınvestıtsııalyq quny 2 mlrd. 680 mln. teńgeni quraıdy. Búgingi tańda "Ordabasy nan" ónimderi otandyq naryqpen qatar, Aýǵanstan, Qyrǵyzstan, Ózbekstan elderine eksporttalýda.
Munan soń oblys ákimi Bórjar aýyl okrýgindegi «Mıgraj-B» JShS-niń mal bordaqylaý alańyn da aralap kórdi. Bul keshen bir mezette 200 iri qara mal men jylqy bordaqylaýǵa yńǵaılastyrylǵan. Munda jylyna 70 tonna et óndirý josparlanyp otyr.
Oblys basshysy aıaldaǵan kelesi nysan - jeke kásipker Ermekbaı Ýteevtiń jylyjaıy boldy. «Aýyl sharýashylyǵyn qarjylaı qoldaý qory» arqyly 2 mln. teńge nesıe alǵan kásipker jylyjaı salyp, 2 azamatty jumyspen qamtyp otyr.
Sondaı-aq, oblys basshysynyń nazaryna «Órleý» baǵdarlamasy boıynsha aýdanda atqarylǵan jumystar usynyldy. 2017 jyldyń 10 aıynda baǵdarlama aıasynda aýdan boıynsha 1142 otbasyǵa 307 mıllıon teńgeden astam qarjy úılestirilgen. Azamattardyń deni alǵan qarjyny mal sharýashylyǵyn júrgizýge jumsaýda. Janseıit Túımebaev «Órleý» jobasymen qarjy alǵan qolónershilerden dombyra satyp aldy.
«Ońtústikqazaqstandyqtar «Órleý» jobasynyń tıimdiligin kóre bastady. Órleý» jobasy aıasynda búginge deıin jalpy somasy 6 mlrd-tan astam teńge bolatyn shartty aqshalaı kómekti 20 myńnan astam jerlesimiz alyp, otbasylyq tabystaryn eselep otyr. Sondyqtan kásip ashyp, tirlik isteımin degen azamattarǵa memleket tarapynan jasalynatyn jeńildikterdi nasıhattaý qajet» - Janseıit Qanseıituly.
Óńir basshysy Tórtkúl aýylyndaǵy «Nur Agro 73» JShS- niń maqta óńdeý zaýytynyń da jumysymen tanysty. Óz jumysyn 2016 jyly bastaǵan nysannyń ınvestıtsııalyq quny - 255 mln. teńgeni quraıdy. Munda búginde 300 adam turaqty jumyspen qamtylǵan. Onyń 230-y jergilikti turǵyndar. 14 óndiristik qurylǵyda jylyna 30 myń tonna maqta óńdeledi. Oblys kóleminde Maqtaral, Shardara, Ordabasy aýdandarynan maqta qabyldanady. Tórtkúlde daıyndalǵan maqta talshyqtary búginde Chehııaǵa, Belorýsııa men Moldovaǵa eksporttalýda. Munan ózge Shymkenttegi «Melanj tekstıl» fabrıkasyna jóneltiledi.
