Ókinish pen keshirim: Sherzat sotyndaǵy jaryssózde aıyptalýshylar ne aıtyp jatyr
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysynda jaryssóz ótip jatyr.
Sottalýshy, kámeletke tolmaǵan Dýman Ysqaq sońǵy sózin aıtty.
— Men advokatym aıtqan sózdermen tolyq kelisemin. Men naqty qylmys jasalǵanyn 4 qazan saǵat 11-12-ler shamasynda bildim. Qurmetti sot, meni aqtaýyńyzdy suraımyn. Barlyǵy ádil bolýyn suraımyn, — dedi ol.
Onyń sózin sottalýshy Shyńǵys Belǵojaev jalǵastyrdy. Ol Sherzattyń ákesi Qarjaýbaı Nurymovty QR Qylmystyq kodeksiniń 293-babymen jaýapkershilikke tartýdy surady.
— Men sol jerge baryp, bolǵan jaǵdaıǵa aralasyp, uryp-soǵyp, tóbeleste bolǵanym úshin jábirlenýshilerden keshirim suraımyn. Bolǵan oqıǵaǵa qatty ókinemin. Qurmetti sot, biz eshqandaı qylmystyq top emespiz. Qasaqana tóbelesemiz degen oıymyz da, nıetimiz de bolǵan joq. Mundaı oqıǵa bolatynyn bilgende, bizdi myltyqpen daıyndalyp kútip otyrǵanyn bilgende, barmaq túgili, múldem jolamaıtyn edim. Qurmetti sot, Nurymov Qarjaýbaı «Shyńǵys meni pyshaqpen qýalap, kıimimdi jyrtty» dep ótirik aıtyp, jalǵan sóılegen bolatyn. Ondaı jaǵdaı bolǵan joq jáne men bákiniń sabymen urǵan joqpyn. Qalǵan is-áreketterimniń barlyǵyn moıyndaımyn. Birinshi kúnnen bastap moıyndap kelemin. «Er-jigit kórmeımin degen jerin úsh kóredi, jaqsy at baspaımyn degen jerin úsh basady» deıdi. Sol sekildi bizdiń oqıǵa oılamaǵan jerde boldy. Biz depýtattyń, ákimniń, prokýrordyń, sottyń balalary emespiz. Qarapaıym otbasynan shyqqan adamdarmyz. Bizge taǵylǵan aıyp sekildi Nurymov Qarjaýbaı myrzaǵa QR Qylmystyq kodeksiniń 293-babymen jaýapkershilikke tartýyńyzdy suraımyn, — dedi ol.
Sonymen qatar Shyńǵys Belǵojaev jábirlenýshi taraptyń materıaldyq ótem týraly azamattyq talabyn qanaǵattandyrmaýdy surady.
— Azamattyq talap boıynsha eseptep qarasaq 660 mln shyǵyp tur. Mundaı mólsherdegi somany osy jerdegi 9 adam bolyp ómir boıy Qazaqstanda jumys istesek te, taba almaımyz. Sondyqtan bul ótinishhatty qanaǵattandyrýsyz qaldyrýyńyzdy suraımyn, — dedi ol.
Odan keıin sottalýshy Nurqııas Іlııasov sóz aldy. Ol óz isine ókinetinin aıtty.
— Oqıǵa bolǵan jerge barǵanyma qatty ókinemin. Ol oqıǵada Sherzat marqum meni urdy, ekinshiden aǵasy bizge atty. Men sóılesý maqsatynda barǵanmyn. Úshinshi ret oqtap jatqan kezde naqty bizge atady degen oımen myltyǵyn alyp, urdym. Solaı istegenime ókinip otyrmyn. Bárinen keshirim suraımyn. Qurmetti sot, sizden suraıtynym — ádil jaza, — dedi ol.
Sottalýshy Dıdar Qalıahmet te óziniń sońy sózinde sottan ádil sheshim shyǵarýdy ótindi.
— Men Sherzattyń ákesinen jáne anasynan keshirim suraımyn. Onyń sebebi — polıtsııa qyzmetkerlerine qońyraý shalmaǵanym úshin jáne arashalamaǵanym úshin. Ekinshiden, anamnan, ákemnen, jubaıymnan, bala-shaǵamnan keshirim suraımyn. 8 aı boıy ol kisilerge halyqtyń jaman sózderinen keshirim suraımyn. Qurmetti sot, ádil sheshim shyǵarýyńyzdy suraımyn. Men munda eshkimmen tóbelesken joqpyn. Tóbelesken dálelderińiz bolsa, dáleldeńizder. Sizder dáleldegen joqsyzdar, — dedi ol.
Sonymen qatar Sherzattyń ólimine basty kúdikti jaryssózde sońǵy sózin aıtty. Oǵan buzaqylyq, adam óltirý, qylmysqa daıyndalý jáne qylmysqa oqtalý aıyby taǵylyp otyr.
— Aldyńǵy jaýabymda aıtyp ótkendeı Sherzat Polatty men óltirgen joqpyn. Ony óltirgen bolsam, aldyńǵy jaýabymda-aq moıyndaıtyn edim. Men istegen is-áreketimnen qashatyn jigit emespin. Aqıqatty aıttym, jaýabymdy nege ózgertkenimdi aıttym. Men jazadan qoryqpaımyn, maǵan tıisti jaza berýińizdi suraımyn, ádil sheshim shyǵarýyńyzdy suraımyn. QR Qylmystyq kodeksiniń 106-babymen jaza taǵaıyndaýyńyzdy suraımyn. Barsha qazaq elinen keshirim suraǵym keledi. «Baıdyń balasy, ákesi ákim» dep jerden alyp, jerge salyp jatyr. Eshqandaı da aǵa-kókem joq. Eshqandaı ákem joq, jalǵyz ǵana anam bar. Anammen ǵana turam. Eshqandaı qylmystyq top emes. Men de olaı bolady dep oılaǵan joqpyn. Sherzatty óltirgen men emes. Naqty dálelim joq, sol úshin kim istegenin aıta almaımyn, — dedi Abzal Shynasyl.
Eske salaıyq, keshe prokýror sottalýshylarǵa qandaı jaza suraǵany belgili boldy.
Sonymen qatar prokýror kýáger qyzdardyń is-áreketin qaıta tekserý kerek ekenin atap ótti.
Al sottalýshynyń advokaty Sherzattyń ákesine qatysty is qozǵaýdy ótindi.
Búgin Darhan Áskentaı men Ravıl Sákıev sońǵy sózin aıtty.
Olardan keıin Nurbol Toqtaýbaev pen Azamat Toqtaýbaev sóz sóıledi.