ÓKM Operatorynan 180 mlrd teńge memleketke qaıtaryldy

NUR-SULTAN. QazAqparat – Bıyl Qazaqstanda 1300-den astam sybaılas jemqorlyq isi tirkelip, 430 mlrd teńge qazynaǵa qaıtarylǵan. Sybaılas jemqorlyqqa qarsy is-qımyl agenttiginiń tóraǵasy Oljas Bektenov vedomstvonyń alqa otyrysynda osyndaı derek aıtty, dep habarlaıdy QazAqparat tilshisi.

«Elimiz boıynsha 1300-den astam sybaılas jemqorlyq qylmysy tirkeldi. 800-den astam tulǵanyń jemqorlyǵy áshkerelendi. Olardyń 140-y túrli deńgeıdegi basshylar. Aýyr qylmystardy anyqtaý 33 paıyzdan astam ósti. Tergeý qorytyndysy boıynsha 592 is sotqa jiberilip, 357 jemqor sottaldy. Ekonomıkalyq resýrstardy zańsyz shoǵyrlandyrýǵa jáne olardy memleket menshigine qaıtarýǵa baılanysty isterdi tergeý erekshe baqylaýda tur. Qabyldanǵan sharalardyń nátıjesinde memleketke 430 mlrd teńge nemese shamamen 1 mlrd AQSh dollary somasyna aktıvter qaıtaryldy», - dedi agenttik basshysy.

Sondaı-aq, ol aty shýly «ÓKM Operatorynyń» isine toqtaldy.

«Bul is boıynsha 180 mlrd teńgeden astam qarajat jymqyrýǵa jol berilmedi. Olar tolyqtaı memleketke qaıtarylyp, áleýmettik maqsattarǵa jumsalyp jatyr. Quny 57 mlrd teńge bolatyn 600-den astam temirjol kireberisteri memleket baqylaýyna ótti. Áńgime sala ókilderiniń tilimen aıtqanda, «sońǵy shaqyrymdar» týraly bolyp otyr», - dedi Oljas Bektenov.