ÓQM bıznes-qoǵamdastyqpen birlesip, jeńil ónerkásipti damytý baǵdarlamasyn ázirleýge kirisedi

ASTANA. KAZINFORM - Úkimette QR Premer-mınıstriniń orynbasary – ulttyq ekonomıka mınıstri Serik Jumanǵarınniń tóraǵalyǵymen ekonomıkalyq ósýdi qamtamasyz etý jónindegi shtab otyrysy ótti. Onda jeńil ónerkásipti damytý máselesi qaraldy.

Úkimettiń baspasóz qyzmetiniń habarlaýynsha, talqylaýǵa salalyq qaýymdastyqtardyń, onyń ishinde «Qaz Textile Industry» jeńil ónerkásip kásiporyndarynyń ulttyq birlestigi» ózin-ózi retteıtin uıymynyń jáne «Jeńil ónerkásip kásiporyndarynyń ózin-ózi retteıtin uıymy» ZTB jáne salanyń iri kásiporyndarynyń, onyń ishinde «AZALA Group» MK, «Qazaq Tigin Fabrikasy» JShS, «Qazjeńilónerkásip-Almaty» JShS, «Global-Arnaıykıim» JShS, «TarazTeriAıaqkıim» JShS tóraǵalary jáne basqalar qatysty.

Ónerkásip jáne qurylys mınıstrliginiń málimetinshe, sońǵy bes jylda jeńil ónerkásip turaqty damýdy kórsetip keledi. 2025 jyldyń qorytyndysy boıynsha óndiris kólemi NKI-niń 3%-ǵa ósý josparymen 13,2%-ǵa ósip, 260 mlrd teńgege jetti. Óńdeý ónerkásibiniń qurylymyndaǵy jeńil ónerkásiptiń úlesi – 0,8%. Aıta ketsek, jeńil ónerkásip qurylymynda 60%-dan astam toqyma óndirisi, 32% – kıim óndirisi jáne 6,5% aıaq kıim men bylǵarydan jasalǵan buıym óndiriledi. Kásiporyndardyń 97%-dan astamy shaǵyn bıznes sýbektileri.

Jeńil ónerkásipti damytý maqta men teri óńdeýdi tereńdetý, sıntetıkalyq talshyq óndirisin keńeıtý jáne qosylǵan quny joǵary ónim shyǵarýdy ulǵaıtý arqyly josparlanýda.

2025 jyly elimizde maqtanyń rekordtyq kólemi, 466 myń tonna jınaldy. 116,1 myń tonna maqta talshyǵy, 500 tonna ıirilgen jip, 5,2 mln sharshy metr mata jáne 28,6 mln birlik daıyn toqyma buıymy óndirildi.

Mysal retinde, ónerkásip jáne qurylys vıtse-mınıstri Oljas Saparbekov bir tonna maqta talshyǵyn qaıta óńdeý 1 650 birlikke deıin daıyn toqyma ónimir shyǵarýǵa múmkindik beretinin atap ótti. Shıkizatty tolyq qaıta óńdeýdi qamtamasyz ete otyryp, yqtımal qosylǵan qun $1,67 mlrd-qa jetip, sondaı-aq 5 myńǵa deıin jumys ornyn qurýǵa yqpal etýi múmkin.

Salada «KazFeltec» oqshaýlaý óndirisin, Talshyqteks toqylǵan polıpropılen geokenep óndirisin jáne Túrkistan toqyma maqta-mata ıirilgen jip óndirisin qosqanda, ortamerzimdik perspektıvaǵa negiz bolatyn jobalar iske asyrylýda.

Sonymen qatar oń dınamıkaǵa qaramastan, otyrysqa qatysýshylar keshendi sheshýdi talap etetin birqatar júıeli máseleni belgiledi. Olar shıkizat bazasyn damytýǵa, óndiristi jańǵyrtýǵa, rettelip satyp alý tetigin jetildirýge jáne qarjylyq qoldaý sharalaryn keńeıtýge qatysty.

Sala kásiporyndary damýdyń boljamdy jaǵdaıyn qalyptastyrý kezinde óndiristi keńeıtýge jáne jańa jumys oryndaryn qurýǵa daıyn ekendigin rastady.

Belgilengen mindetterdi eskere otyryp, bıznes-qoǵamdastyq pen salalyq qaýymdastyqtardyń qatysýymen jeńil ónerkásipti damytýdyń keshendi baǵdarlamasyn ázirleý týraly sheshim qabyldandy. Júıelik qujattyń qajettiligi salanyń oń dınamıkasyna da, onyń odan ári ósý áleýetine de baılanysty.

-Jeńil ónerkásip biz úshin halyqty jumyspen qamtý turǵysynan óte mańyzdy. Mysaly, Túrkistan oblysynda, elimizdiń eń kóp qonystanǵan oblysynda jeńil ónerkásip kásiporyndarynyń eń kóp sany bar. Olardyń odan ári damýymen jergilikti halyqty jumys oryndarymen jáne laıyqty jalaqymen qamtamasyz etý múmkindigi bar. Ónerkásip jáne qurylys mınıstrligi bıznespen birlesip, jeńil ónerkásipti damytý baǵdarlamasyn ázirleýdi bastaýy qajet. Qujatta bazalyq kásiporyndar, olardyń aǵymdaǵy kórsetkishteri men maqsatty baǵdarlary anyqtalýy kerek. Qarsy mindettemeler, eń aldymen, jergilikti turǵyndardy jumyspen qamtý jáne óndiristi ulǵaıtý, — dep atap ótti Serik Jumanǵarın.

Osyǵan deıin Úkimettiń jańa óndiristerdi iske qosýdy jedeldetetini týraly jazdyq.