Ókilettikti asyra paıdalanǵan ákim men alaıaqtyq jasaǵan merdiger sottaldy
KÓKShETAÝ. KAZINFORM - Aqmola oblysynda ókilettikti asyra paıdalanǵan ákim men alaıaqtyq jasaǵany merdigerge sot úkimi shyqty.
Aqmola oblysy soty baspasóz qyzmetiniń málimetinshe, 2021 jyly Atbasar aýdandyq ákimdiginde Poltavka selosynda aýylishilik kósheni jóndeý úshin selolyq okrýg ákimi men merdiger JShS memlekettik satyp alý týraly shart jasasqan.
Atalmysh JShS quryltaıshysynyń seriktesti dırektory bolmaǵandyqtan, qujattarǵa qol qoıýǵa esh ruqsaty joq. Biraq, soǵan qaramastan ol oryndalǵan jumystardyń jalǵan aktilerin jasap, qol qoıǵan. Ákimde qujattardyń (akti men jumys quny týraly anyqtama) jalǵan ekenin bile tura jumystardy qabyldap, qol qoıǵan. Osy arqyly bıýdjettiń 40 mln teńge aqshasy JShS shotyna aýdarylǵan.
Sonyń saldarynan memleketke asa iri mólsherde materıaldyq zalal keltirildi. Keltirilgen zalaldyń somasyn sottalýshylar úkim shyǵarylǵanǵa deıin ótegen.
«Atbasar aýdandyq sotynyń úkimimen aýyldyq okrýgtiń ákimi laýazymdy ókilettikterin asyra paıdalanǵany úshin memlekettik qyzmette qyzmet atqarý quqynan ómir boıyna aıyryla otyryp, (QR QK 361-babynyń 3-bólimi 4-bóligi) 2 jylǵa bas bostandyǵynan aıyrý jazasyna kesildi. Al JShS quryltaıshysy asa iri mólsherdegi alaıaqtyq jasaǵany úshin (QR QK-niń 190-babynyń 2-bólimi 4-bóligi) 5-jyl merzimge bas bostandyǵynan aıyryldy. Sonymen birge, ol materıaldyq-jaýapty laýazymdardy atqarý quqyǵynan ómir boıyna aıyryldy. Sot úkimi zańdy kúshine engen joq», - dedi vedomstvodan.
Sot aýyldyq okrýg ákimi tarapynan laýazymdyq ókilettikterdi teris paıdalaný deregi boıynsha aldaǵy ýaqytta osyndaı quqyq buzýshylyqtarǵa jol bermeý jóninde sharalar qabyldaý úshin aýdan ákiminiń atyna jeke qaýly shyǵardy.
Sot úkimi aýdannyń aýyldyq okrýg ákimderine, TKSh jáne qurylys bóliminiń basshylaryna eskertý retinde kórsetý sot protsessi formatynda jarııalandy.
Aıta ketsek, budan buryn Kókshetaý ákimdigi 2,5 mlrd teńgege zańsyz úı saldyrmaq bolǵanyn jazǵan edik.
