Oklendte fýtboldan álem chempıonaty bastalaıyn dep jatqanda qarýly adam oq jaýdyrdy
Tańǵy saǵat 07:22-de ortalyqtaǵy qurylys alańynda bolǵan oqıǵadan keıin taǵy alty adam, sonyń ishinde polıtsııa qyzmetkerleri jaraqat aldy, qarýly adam da mert boldy.
Premer-mınıstr Krıs Hıpkıns bul shabýyldy lańkestik áreket retinde qarastyrmaıtynyn aıtty.
«Týrnır josparlanǵandaı ótedi» dedi ol.
Onyń aıtýynsha, polıtsııanyń qaýip-qaterdiń betin qaıtardy, bári tynysh.
«Shabýyldyń saıası nemese ıdeologııalyq sebebi joq» dedi premer-mınıstr.
Qarýly adam pompalyq sholaq myltyqpen qarýlanǵan.
Hıpkıns myrza eldi qaterden aman alyp qalǵan Jańa Zelandııa polıtseılerine alǵys aıtty.
Oklend meri Ýeın Braýnnyń aıtýynsha, FIFA búkil qyzmetkerleri men fýtbol komandalaryna eshqandaı qaýip joq.
Ashylý matchy Eden Park stadıonynda Jańa Zelandııa men Norvegııa arasynda ótedi.
Sport mınıstri Grant Robertson bul aımaqta qaýipsizdikti qamtamasyz etý úshin qosymsha polıtsııa jumys isteıtinin aıtty.
Áıelder arasyndaǵy toǵyzynshy álem chempıonatyn Jańa Zelandııa men Avstralııa birlesip ótkizip jatyr.
Buǵan deıin qala basshysy turǵyndarǵa úıde qalyp, qalaǵa shyqpaý kerektigin eskertken.
Polıtsııanyń habarlaýynsha, bireý habarlasyp, qurylys alańynda beımálim adamnyń qarýdan oq atyp jatqanyn estigenin jetkizedi. Qarýly adam ǵımarat arqyly ótip, oq atýdy jalǵastyrǵan.
Sodan keıin ol lıft shahtasyna kirip ketti. Polıtsııa onymen tildesip, baılanys ornatýǵa tyrysty. Biraq ol eshkimdi tyńdamaı taǵy oq jaýdyrdy jáne kóp uzamaı ózi de mert boldy.
Atystan keıin jaǵalaý men ortalyq iskerlik aýdanǵa qarýly polıtsııa molynan jınaldy.
AQSh Ulttyq áıelder fýtbol lıgasynyń bas sport dırektory Tatıana Haennı atys bolǵan jerge jaqyn jerde turady.
Ol BBC News-ke sonda kelgen polıtsııa kólikteriniń dybysynan oıanǵanyn jáne olar oǵan úıde qalýdy buıyrǵanyn aıtty.
«Ázirge bizde bári jaqsy, qaýip joq», - dedi ol.
