Ókilder palatasy Kongress músheleriniń aktsııa satyp alýyn shekteıtin zań jobasyn qabyldady

Zań jobasyn barlyq respýblıkashyldar men 13 demokrat qoldady.

Atalmysh zań jobasy zań shyǵarýshylarǵa, olardyń jubaılaryna jáne asyraýyndaǵy balalaryna memlekettik kompanııalardyń aktsııalaryn satyp alýǵa tyıym salady jáne kez kelgen josparlanǵan baǵaly qaǵazdardy satý týraly aldyn ala habarlaýdy talap etedi.

Zańdy buzǵandarǵa 2000 dollar nemese kelisim baǵasynyń 10%-y kóleminde aıyppul salynady, sonymen qatar kez kelgen paıda tárkilenedi.

Zań jobasynyń avtory Braıan Steıl, zańnyń ınsaıderlik aqparatty jeke paıda úshin paıdalanýdyń aldyn alýǵa baǵyttalǵanyn málimdedi.

Onyń aıtýynsha, jańa erejeler Kongreske degen senimdi arttyrady jáne zań shyǵarýshylardyń qarjylyq qyzmetin baqylaýdy kúsheıtedi.

Demokrattar zań jobasyn synǵa alyp, onyń Kongress múshelerine qoldanystaǵy aktsııalardy ıelenýge tyıym salmaıtynyn jáne prezıdent nemese ákimshilik qyzmetkerlerine qoldanylmaıtynyn atap ótti.

Mundaı bastamalardy jaqtaýshylar qazirgi qoldanystaǵy zań tıimsiz dep sanaıdy, óıtkeni mámilelerdi jarııalaý talaptaryna qaramastan, birde-bir kongresmen osy ýaqytqa deıin ony buzǵany úshin jaýapqa tartylǵan joq.

Aktsııalar saýdasyn shekteý boıynsha jańa bastamalar Ókilder palatasynda da, Senatta da jalǵasyp jatyr. Keıbir zań shyǵarýshylar Kongress músheleriniń, prezıdenttiń, vıtse-prezıdenttiń jáne olardyń otbasylarynyń jeke aktsııalarǵa ıelik etýine tolyq tyıym salýdy jaqtap otyr, biraq odan da qatań zań jobalarynyń eshqaısysy áli tolyq kúshine engen joq.

Buǵan deıin AQSh Kongresi Pentagonǵa 1,15 trln dollar bólýdi maquldaǵan bolatyn.