Ókilder palatasy AQSh federaldyq agenttikterin qarjylandyrý týraly zań jobasyn maquldady
ASTANA. KAZINFORM – Federaldyq agenttikterdi qyrkúıekke deıin qarjylandyrýǵa múmkindik beretin jańa zań jobasy maquldaný úshin Senatqa joldandy, dep habarlaıdy PBS.
Ókilder palatasyndaǵy daýys berý kezinde qarjylandyrý týraly zań jobasyn 217 adam qoldasa, 213-i oǵan qarsy boldy.
Senatta respýblıkashylarǵa zań jobasy prezıdent Donald Tramptyń ústeline jetý úshin kemi 8 demokrattyń qoldaýy qajet bolady.
Zań shyǵarýshylardyń málimdeýinshe, zań jobasy qorǵanysqa baılanysty emes shyǵyndardy 2024 jylǵy bıýdjetpen salystyrǵanda 13 mlrd dollarǵa qysqartady jáne qorǵanys shyǵyndaryn 6 mlrd dollarǵa arttyrady, bul eki sanat úshin shyǵyndardyń shamamen 1,7 trln dollar jalpy kórsetkishimen salystyrǵanda shamaly ózgeris bolyp otyr.
Demokrattardy kóbine zań jobasyndaǵy Tramp ákimshiligine shyǵyndar týraly sheshimder shyǵarýda bılik jáne basymdyqtardy qaıta tujyrymdaý erkindigin berýi alańdatyp otyr.
Óz kezeginde demokrattar 11 sáýirge deıin úkimetti qarjylandyrýdy qarastyratyn balama zań jobasyn usyndy. Respýblıkashylardyń qoldaýy sátsiz bolǵan jaǵdaıda zań jobasy «B» jospary retinde qyzmet etýi múmkin.
Buǵan deıin Tramp Kongresti úkimetti ýaqytsha qarjylandyrý týraly zań jobasyn qoldaýǵa shaqyrǵanyn jazǵan bolatynbyz.