Ókildi organdardy kúsheıtý memlekettik saıasattyń negizgi basymdyǵy bolyp qala beredi – Toqaev

ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóıledi. Bul týraly Aqorda habarlady.

– Eń aldymen, barshańyzǵa jáne jańa ǵana sóz sóılegen azamattarǵa rızashylyǵymdy bildiremin. Salmaqty, paıdaly oı-pikirler aıtyldy. Onyń bári Parlamenttiń, Úkimettiń aldaǵy jumysynda eskeriletin bolady. Shyn máninde, bul basqosýdyń elimiz úshin mán-mańyzy aıryqsha. Búgingi forýmǵa barlyq aımaqtan jergilikti bılik ókilderi arnaıy keldi. Qazir osy zalda mıllıondaǵan otandasymyzdyń múddesin qorǵap júrgen eki myńǵa jýyq depýtat otyr. Sizder halyqpen tyǵyz jumys istep júrsizder. Jurttyń muń-muqtajyn, talap-tilegin jaqsy bilesizder. Sondyqtan men Memleket basshysy retinde Sizder atqaryp jatqan jumysty udaıy basty nazarda ustaımyn, - dedi Memleket basshysy.

Prezıdent máslıhattardyń áleýetin odan ári kúsheıtý úshin birqatar mindetti oryndaý kerek ekenin atap ótti.

– Jalpy, mundaı jıyn óńirlik saıasattyń tıimdiligin baǵalap, ózekti máselelerdi talqylaýǵa múmkindik beredi. Ózderińizge málim, Qazaqstanda keń aýqymdy, tarıhı ózgerister júzege asyrylyp jatyr. Igi bastamalardyń bári de halyqtyń ál-aýqatyn arttyrý úshin qolǵa alyndy. Biz memlekettik basqarý júıesin, ekonomıkany jáne áleýmettik salany túbegeıli jańǵyrtýǵa kiristik. Bul oraıda, máslıhattardyń aldynda turǵan mıssııa – aıryqsha. Ókildi organdardy kúsheıtý memlekettik saıasattyń negizgi basymdyǵy bolyp qala beredi. Biz buǵan deıin biraz sharýa atqardyq. «Qýatty aımaqtar – qýatty el» qaǵıdatyna sáıkes máslıhattardyń bedelin kóterdik. Sonyń arqasynda osy qurylymdar memlekettik basqarý júıesindegi basty ınstıtýttyń birine aınaldy. Degenmen máslıhattardyń áleýetin odan ári kúsheıtý úshin birqatar mindetti oryndaýymyz kerek, - dedi Prezıdent.

Memleket basshysynyń qatysýymen máslıhat depýtattarynyń ІІІ respýblıkalyq forýmy ótip jatqanyn jazǵan edik.