OKQ byltyr jýrnalısterdi qyzyqtyrǵan taqyryptardy atady
ASTANA. QazAqparat - Ortalyq kommýnıkatsııalar qyzmetiniń basshysy Anastasııa Şegortsova 2017 jyly atqarylǵan jumystardy qorytyndylady, dep habarlaıdy «QazAqparat» HAA tilshisi.
«Byltyr bizdiń alańda 1 myńǵa jýyq spıkerdiń qatysýymen 354 baspasóz máslıhaty ótkizildi. 1 myńǵa jýyq spıkerlerdiń ishinde ortalyq jáne jergilikti organdardyń, ulttyq kompanııalardyń, ÚEU basshylary men bıznes, mádenıet jáne ózge de salanyń ókilderi bar. Jalpy, aqparattyq materıaldyń jıyntyǵy baspasóz máslıhatynyń qorytyndysy boıynsha 35 myńǵa jetti», - dedi Anastasııa Şegortsova QR Aqparat jáne kommýnıkatsııalar mınıstrliginiń keńeıtilgen alqa májilisinde.
Ol sonymen qatar, oqyrman qaýym men BAQ ókilderin qyzyqtyrǵan taqyryptardy atady.
«BAQ ótken jyly latyn qarpindegi qazaq álipbıine kóshý, qazaq-qyrǵyz shekarasyndaǵy ónimderdiń qaýipsizdigi, janar-jaǵarmaı jetispeýshiligi máselesi, qarjy naryǵyndaǵy jaǵdaı, sonymen qatar Ilıa Ilınniń sporttyq joldaǵy jospary sekildi taqyryptarǵa kóp qyzyqty», - dedi OKQ basshysy.
Anastasııa Şegortsovanyń aıtýynsha, esep berý kezeńinde ár túrli formattaǵy 28 shara, onyń ishinde tilshiler men baspasóz hatshylaryna arnalǵan semınar-trenıngter, lektorııalar, galstýksyz kezdesýler men «Shyńtóbe» dıskýssııalyq klýbynyń otyrysy ótkizilgen.
