Ókilettigin toqtatqan Bekbolat Tileýhan basqa depýtattarǵa ótinish aıtty
Aıta keteıik, palatanyń jalpy otyrysynda depýtat Bekbolat Tileýhannyń ókilettigi merziminen buryn toqtatyldy.
Ol mindetterin atqarýdan óz erkimen bosatý týraly ótinish bergen. Osy oraıda ol búgin Májilis minberinen sóılegen sózinde jańa qyzmetti boıynsha ómiriniń kelesi kezeńine qadam basyp jatqanyn aıtty.
«Sizdermen jumys istegen bir sátim - ómirimniń bir belesi, kezeńi, ıaǵnı men úshin baqytty jaqsy shaǵym. Taıymda tanyp, tulpardaı qylyp topqa qosqan áýeli Elbasyna rahmet. Nuraǵamyzdyń bastaǵan jolyn ary qaraı jalǵastyryp jatqan Memleket basshymyz Qasym-Jomart Kemelulynyń qamqorlyǵyna, jasap jatqan marapattaryna sheksiz alǵysymdy bildiremin. Parlament qabyrǵasyndaǵy ómirim óte bir sátti kezeń dep bilemin. Endi, qaı jerde elge, memleketke paıdam kóbirek tıedi, sol jerde bolǵandy mindet dep tanyǵandyqtan, ómirdiń kelesi kezeńine qadam basyp jatyrmyn. Biraz jumys istedik, artyq aıtqan sózimiz bolsa, jaza basqan jerimiz bolsa, keıbir áriptesterimnen keshirim suraımyn, ǵafý ótinemin», - dedi B. Tileýhan.
Sonymen qatar ol Parlament depýtattaryna óz ótinishin jetkizdi.
«Qazaq deıtin ulttyń tiliniń, mádenıetiniń, tarıhynyń, ǵylymynyń, rýhanııatynyń, salt-dástúriniń Qazaqstan Respýblıkasynan basqa barar jeri, basar taýy joq, basqa damıtyn jeri joq. Qazaq – ol shabýylshy jurt emes, qorǵanýshy jurt, tarıhta esesi ketken jurt. Osy nárse esterińizde bolyp, parasat kózderińiz tarıhı sanamen, memleketshildik oımen árqashan júrekterińizdiń túkpirinde tursa eken degen ótinishim bar. Muny depýtat retinde emes, saılaýshy retinde aıtyp otyrmyn. Іsterińizge bereke tileımin», - dedi Bekbolat Tileýhan.
Budan buryn habarlanǵandaı, eks-depýtat Búkilálemdik etnosport konfederatsııasynyń birinshi vıtse-prezıdenti bolyp taǵaıyndaldy.
