Oqý-aǵartý mınıstri balalar arasyndaǵy quqyqbuzýshylyqtyń artýyna alańdaýly
ASTANA. KAZINFORM - Qazaqstan Respýblıkasynyń Oqý-aǵartý mınıstrliginde Memleket basshysy Qasym-Jomart Toqaevtyń bilim berý júıesin damytý jónindegi tapsyrmalarynyń iske asyrylýy, sondaı-aq bilim berý sapasyn arttyrý, balalardyń qaýipsizdigin qamtamasyz etý máseleleri talqylandy, dep habarlaıdy mınıstrliktiń baspasóz qyzmeti.
Jıynǵa mınıstrliktiń qurylymdyq bólimsheleriniń, óńirlik bilim basqarmalarynyń jáne aýmaqtyq bilim salasyndaǵy sapany qamtamasyz etý departamentteriniń basshylary qatysty.
Bilim salasynda sapany qamtamasyz etý komıtetiniń tóraǵasy Serik Áshirov «Keleshek mektepteri» ulttyq jobasy aıasyndaǵy mektepterdi lıtsenzııalaý barysy, kúrdeli jóndeý júrip jatqan mektepterde oqý protsesin uıymdastyrý, Orta bilim berý komıtetiniń tóraǵasy Qanybek Jumashev «Bilim berýdegi ózgeristerdiń 1000 kóshbasshysy» jobasynyń júzege asyrylýy, Infraqurylymdyq damý departamentiniń dırektory Ádilbek Musabaev oqýshylardy mektepke tasymaldaýdy uıymdastyrý jumystary týraly baıandady.
Mınıstr Juldyz Súleımenova ár óńir basshylarynyń esepterin de tyńdap, bul baǵyttaǵy jumystardy jetildirýdi tapsyrdy. Sondaı-aq balalar men pedagogter úshin jaıly ári qaýipsiz bilim berý ortasyn qalyptastyrý, búgingi syn-qaterlerge sáıkes bilim sapasyn arttyrý jáne osy baǵytta pedagogterdiń áleýetin kóterý memlekettik bilim berý saıasatynyń basymdyǵy ekenin atap kórsetti.
«Oqý jylynyń basynan balalar arasynda bolǵan quqyqbuzýshylyqtardyń kóbeıýi asa alańdatarlyq másele. Bizdiń negizgi mindetimiz, bilim berý uıymdarynda árbir balanyń sapaly bilim alýymen birge, zań men tártip qaǵıdatynyń saqtalýyn qamtamasyz etý. Bul baǵytta balalarmen tárbıelik jumystar, ata-analarmen yntymaqtastyq mazmundy túrde kúsheıtilýi kerek. Balalardyń apatty ǵımarattarda bilim alýyna jol berilmeýi, mektepke tasymaldaýda olardyń qaýipsizdigine nuqsan keltirilmeýi tıis. Bul búkil bilim berý júıesi qyzmetkerleriniń ortaq mindeti», — dedi mınıstr Juldyz Súleımenova.
Sondaı-aq, jıynda turǵyndarmen, aqparat quraldarymen keri baılanysty jolǵa qoıý máselesi de kóterildi.
Jıyndy qorytyndylaı kele, mınıstr aýyldyq jáne shalǵaı eldi mekenderdegi balalardy mektepke tasymaldaýdy tıimdi uıymdastyrý, balanyń qaýipsizdigi men quqyqtarynyń qorǵalýyna baǵyttalǵan jumystardy kúsheıtý jáne bilim berý isiniń barlyq qatysýshylary úshin tıimdiligin arttyrý úshin olardyń ótinishterine jergilikti jerlerde jedel den qoıýdy uıymdastyrý týraly bilim basqarmalary men aýmaqtyq departament basshylaryna naqty tapsyrmalar júktedi.
Osyǵan deıin Túrkistanda bastaýyshtyń oqýshylary irgetasy shógip, edenderi shirigen mektepte oqyp kelgeni týraly jazdyq.
Sondaı-aq Mańǵystaýda oqýshy qyzder tóbelesi, ata-analary jaýapqa tartyldy.