«Ohotzooprom» ınspektory kıikti jappaı atý kúdigimen ustaldy
NUR-SULTAN. QazAqparat - Kıikti jappaı atý kúdigimen bir top adam ustaldy. Bul týraly QR Іshki ister mınıstriniń keńesshisi - resmı ókil Nurdildá Oraz aıtty, dep habarlaıdy QazAqparat tilshisi.
«17 naýryzda Aqmola jáne Qaraǵandy oblystarynda múıizderi kesilgen júzden astam óli kıik tabyldy. Osy faktiler boıynsha sotqa deıingi tergeý bastaldy jáne tájirıbeli polıtsııa qyzmetkerleri men kınologtardan arnaıy jedel-tergeý toby quryldy», dedi ol.
Resmı ókildiń aıtýynsha, polıtsııa qyzmetkerleri kıikti jappaı atty degen kúdikpen bir top adamdy, onyń ishinde Aýyl sharýashylyǵy mınıstrligi «Ohotzooprom» respýblıkalyq memlekettik qazynalyq kásiporynnyń ınspektoryn ustady.
«Kúdiktilerge qatysty sot sheshimimen «qamaýda ustaý» jazasy qoldanyldy. Kúdiktilerdiń turatyn jerlerin tintý barysynda qylmys qarýlary, sondaı-aq kıik múıizderi alyndy. Tergeý jalǵastyrylýda», - dedi Nurdildá Oraz.
