Ohot teńizinde keme apatynan 40-tan astam adam qaza tapty
ASTANA. QazAqparat - Ohot teńizinde «Qıyr Shyǵys» traýleriniń batýy saldarynan 40-tan astam adam qaza taýyp, 63 adam qutqaryldy, taǵy 26 balyqshynyń taǵdyry belgisiz, dep habarlaıdy reseılik BAQ. Qazirgi kezde apat qurbandarynyń naqty sany anyqtalyp jatyr.
Keme beısenbi túninde Magadannan shamamen 300 shaqyrym jerde apatqa ushyraǵan. Onyń bortynda 132 adam, sonyń ishinde 78 reseılik jáne 54 sheteldik azamat bolǵan. Aldyn ala málimetter boıynsha, ekıpajdyń quramynda reseılikterden basqa Bırma, Vanýatý, Latvııa jáne Ýkraına elderiniń azamattary boldy.
«Qıyr Shyǵys» traýleriniń sý syıymdylyǵy - 5,7 myń tonna. Kemeniń uzyndyǵy - 104 metr, eni - 16 metr bolǵan. RIA Novostı agenttiginiń derekkózi habarlaǵandaı, keme batar aldynda SOS belgisin bergen joq.
Qazirgi kezde qaıǵyly oqıǵa aıdanynda ótip jatqan izdeý-qutqarý is-qımyldaryna 800-ge jýyq qutqarýshy, tikushaq jáne 26 keme qatystyrylǵan.
