Ógeı sheshesiniń qolynan mert bolǵan oqýshy ony ana dep atap kelgen
QASKELEŃ. QazAqparat - Almatyda ógeı sheshesimen onyń balarynyń qolynan mert bolǵan 11 jastaǵy Órken Azamatulynyń ájesi otbasylyq jaǵdaıy týraly aıtyp berdi, dep habarlaıdy QazAqparat tilshisi sot zalynan.
Órkenniń ájesi marqum nemeresiniń ógeı sheshesin syılaǵanyn aıtty.
«Órkenniń anasymen ajyrasqannan keıin ulym Sharıpamen tanysty. Men onyń eresek balalary bar ekenin bilgem joq. Sóıtsem, ol aldap kelgen eken. 17 jastaǵy qyzyn sińilim dep tanystyrǵan. Úlken balasy týraly estigem de joq. Barlyǵy keıin belgili boldy ǵoı. Ulym men kelin baqytty boldy dep aıta almaımyn. Olar jıi renjisedi. Onyń aty Sharıpa emes, birde Aıda, birde Sharıpa bolady. Órken ony «mama» deıtin. Ol kelgen saıyn, «mama keldi» dep aıtatyn»,- dedi Órkenniń ájesi Baǵdagúl Esenbekova.
Sotta Órkenniń ájesi sottalýshylar Temir men Qadyrjannyń nemeresin ańdyp júrgenin kórgen. Biraq, bulaı bolady dep oılamaǵanyn aıtty.
«Bulardyń júrisi maǵan unamap edi»,- deıdi ol.
Eske sala keteıik, búgin Qaskeleńde 11 jastaǵy Órken Azamattyń ólimine qatysty qozǵalǵan qylmystyq is boıynsha basty sot talqylaýy bastaldy.
Sotta aıyptalýshy retinde marqum balanyń ógeı sheshesi Sharıpa Aqberdıeva men onyń Temir, Aıdana esimdi balalary bar. Sonymen qatar, Temirdiń aǵaıyny kámelet jasqa tolmaǵan Qadyrjan Gýlıamov, taksıst Rýslan Mýtalıev te aıyptalýshy retinde sotqa tartylyp otyr.
Sharıpa Aqberdıeva men Temır Aqberdıev QR QK-niń 99-baby, 2-bóligi, 3,7,14 tarmaqtary (uıymdasqan túrde kisi óltirý) jáne 132-bap (Kámeletke tolmaǵandy qylmystyq iske tartý) boıynsha aıyptalyp otyr. Qadyrjan Gýlıamov 99-baptyń 2-bóligi 3,7,14 tarmaqtary boıynsha jáne 125-baptyń 2-bóligi, 1,5 (uıymdasqan túrde adam urlaý) tarmaqtary boıynsha, al Aıdana Aqberdıeva men Rýslan Mýtalıevke atalǵan qylmystardyń jasalýyna kómek kórsetkeni úshin 99-baptyń 2-bóligi, 3, 7, 14-tarmaqtary jáne QR QK 125-babynyń 2-bóligi, 1,5 tarmaqtary boıynsha is qozǵalǵan.
Buǵan deıin habarlanǵandaı, Órken Azamatuly Almatydaǵy mektepterdiń birinen 2017 jyldyń 19 qańtary kúni joǵalyp ketken. Nemeresiniń joǵalǵany týraly ájesi polıtsııaǵa habarlasqan. Osydan keıin, balanyń múrdesi tabyldy. Onyń ólimine qatysty kúdikti retinde, balanyń ógeı sheshesi men onyń sybaılastary ustaldy. Tergeý amaldarynyń málimetine súıensek, qylmystyq isti uıymdastyryp, jasaǵan Sharıpa Aqberdıeva kúıeýi men enesinen ósh alý úshin osyndaı qylmysqa barǵan
